ފިލިޕީންސް، ސްޕެއިން އަދި ނިއުޒިލޭންޑަށް ނޮން-ރެޒިޑެންޓް ސަފީރުން ޢައްޔަންކުރަން ރައްޔިތުންގެ މަޖިލީހުން ރުހުން ދީފިއެވެ.

ފިލިޕީންސްއަށް ކަނޑައަޅުއްވާ ނޮން-ރެޒިޑެންޓް ސަފީރުގެ މަޤާމަށް އައްޔަންކުރެއްވުމަށް ރައީސުލްޖުމްހޫރިއްޔާ މަޖިލީހަށް ފޮނުއްވެވީ މެލޭޝިއާއަށް ރާއްޖޭން ކަނޑައަޅުއްވާފައި ހުންނަވާ ސަފީރު ޑރ. މަރިޔަމް ޝަބީނާ އަހުމަދު ނަންފުޅެވެ.

ސްޕެއިނަށް ކަނޑައަޅުއްވާ ނޮން-ރެޒިޑެންޓް ސަފީރުގެ މަޤާމަށް ޢައްޔަން ކުރައްވަން އިނގިރޭސިވިލާތަށް ރާއްޖޭން ކަނޑައަޅުއްވާފައި ހުންނަވާ ސަފީރު ޑރ. އިރުތިޝާމް އާދަމްގެ ނަން ފޮނުއްވާފައިވާއިރުޱނިއުޒިލޭންޑަށް ކަނޑައަޅުއްވާ ނޮން-ރެޒިޑެންޓް ސަފީރުގެ މަޤާމަށް ޢައްޔަން ކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވަނީ ސިންގަޕޫރަށް ރާއްޖޭން ކަނޑައަޅުއްވާފައި ހުންނަވާ ސަފީރު މުޙައްމަދު ލުވޭޒުގެ ނަންފުޅެވެ.

Advertisement

ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން އެ ބޭފުޅުންގެ ނަންތައް ދިރާސާކުރުމަށްފަހު ވަނީ ތިން ބޭފުޅުންވެސް ނޮން-ރެޒިޑެންޓް ސަފީރުންނަށް ޢައްޔަންކުރައްވަން ފެންނަކަމަށް ފާސްކޮށްފައެވެ.

އެފަހުން، މިއަދު ބޭއްވި މަޖިލީހުގެ ޖަލްސާގައި ކޮމިޓީ ރިޕޯޓް ހުށަހަޅައި، ވޯޓަށް އެހުމުން، 54 މެންބަރުންގެ ވޯޓުން އެ ބޭފުޅުން މަގާމަށް އައްޔަންކުރަން ވަނީ ފާސްކޮށްފައެވެ.