އަތޮޅުތަކުން މާލެއަށް ދަތުރުކުރާ ލޯންޗުތަކަށް ހެންވޭރު ފެރީ ޓަރމިނަލް މިއަދު ހުޅުވާލައިފިއެވެ.

އެމްޓީސީސީން ވަނީ މިމަހުގެ 6 ވަނަ ދުވަހު، އަތޮޅުތަކުން މާލެއަށް ލޯންޗު ދަތުރުތައް ބާއްވާ ފަރާތްތަކަށް ހުޅުމާލެ ފެރީ ޓާމިނަލާއި ހެންވޭރު ޓާމިނަލް ބޭނުންކުރުމުގެ ފުރުސަތު ދިނުމަށް ތައްޔާރުވަމުންދާކަމަށް ބުނެފައެވެ. އަދި އެކަމަށް ޝައުގުވެރިވާ ފަރާތްތަކުން އީމެއިލް މެދުވެރިކޮށް ހުށަހެޅުމަށް ވަނީ އަންގާފައެވެ.

އެފަހުން ލޯންޗުތަކަށް ރަސްމީކޮށް ހެންވޭރު ޓާމިނަލް ހުޅުވާލަން މިއަދު ބޭއްވި ރަސްމިއްޔާތުގައި ވާހަކަދައްކަވަމުން އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ ވިދާޅުވީ، މީގެ ކުރީން ރާއްޖެތެރެއަށް ދަތުރުކުރާ މީހުން ލޯންޗުތަކަށް އަރައިފޭބުން އޮތީ ވަރަށް ދަތި ގޮތަކަށް ކަމަށެވެ. އަދި އެ މައްސަލަ ހައްލު ކުރުމަށް ހުޅުމާލެއާއި ހެންވޭރު ޓާމިނަލް ބޭނުން ކުރުމުގެ ފުރުސަތު ލޯންޗުތަކަށް ދޭން ނިންމީ ރައީސް މުޢިއްޒުގެ އެދިލެއްވުމަށް ކަމަށެވެ. 

Advertisement

މިއާއެކު އޭނާ ވިދާޅުވީ، ހުޅުމާލޭ ފެރީ ޓާމިނަލް ބޭނުންކުރަން މިހާތަނަށް އެއްވެސް ފަރާތަކުން ޝައުގުވެރިކަން ފާޅުކޮށްފައިނުވާ ކަމަށެވެ. ނަމަވެސް، އެ ކަމަށް އެދި ޝައުގުވެރިކަން ފާޅުކުރާނަމަ އެ ޓާމިނަލް ވެސް ދޫކުރާނެ ކަމަށް ވިދާޅުވިއެވެ.

އެމްޓީސީސީން މީގެ ކުރިން ބުނީ ލޯންޗުތައް އޮޕަރޭޓްކުރާ 7 ފަރާތަކުން އެކަމަށް ޝައުގުވެރިކަން ފާޅުކޮށްފައިވާކަމަށެވެ. އޭގެ ތެރޭގައި އދ އަތޮޅުން ފެންފުށި، މާމިގިލި އަދި ދިއްދޫ ހިމެނެއެވެ. ކ އަތޮޅުން، މާފުށި، ގުޅި، ގާފަރު، އަދި ކާށިދޫ ހިމެނެއެވެ. ބ އަތޮޅުން ތުޅާދޫ، ހިތާދޫ، ގޮއިދޫ، ފެހެންދޫ، އަދި ފުޅަދޫ ހިމެނެއެވެ.

އެމްޓީސީސީން ބުނީ މިހާރު ޝައުގުވެރިކަން ފާޅުކޮށްފައިވާ ފަރާތްތަކާއެކު މި ހިދުމަތް ފެށުމުން ދުވާލަކަށް ޖުމްލަ 15 ފެރީއަށް ޓާމިނަލްތަކުން ހިދުމަތް ދެވޭނެ ކަމަށެވެ. އެއީ ގާތްގަނޑަކަށް 2000 ފަސެންޖަރުންނެވެ. އެމްޓީސީސީން ބުނީ ހެންވޭރު ފެރީ ޓާމިނަލުން މިހާރުވެސް އެއްފަހަރަކާ 5 ލޯންޗް އަދި ހުޅުމާލެ ފެރީޓާމިނަލުން އެއްފަހަރާ 3 ލޯންޗަށް ކައިރިކުރެވޭނޭ ކަމަށެވެ. އެގޮތަށް ކައިރިކުރާ ލޯންޗުތަކަށް ދިނުމަށް ހަމަޖެހިފައިވަނީ 30 މިނެޓެވެ. 

އެމްޓީސީސީން ބުނީ ދަތުރުވެރިން ޓާމިނަލަށް އައި ފުރުމާ ދޭތެރޭ މަޑުކޮށްލުމަށް ޓާމިނަލް އެތެރެ ވަކިބައެއް ހާއްސަކުރެވިފައިވާއިރު، ދަތުރުވެރިންގެ ފަސޭހަޔަކަށް ފާހާނާ އާއި ބޯފެން ލިބޭނޭ އިންތިޒާމު ހަމަޖެހިފައި ހުންނާނޭ ކަމަށެވެ. މީގެ އިތުރުން ޓާމިނަލް ބޭނުންކުރާ ފަރާތްތައް ބޭނުންވާނޭ ގޮތަށް ހިދުމަތްތައް ތަރައްޤީކުރުމަށްވެސް އިސްކަންދޭނޭކަމަށް އެމްޓީސީސީން ބުންޏެވެ.