ކަނޑުމަގުން ރާއްޖެ އެތެރެކުރަން އުޅުނު 6.7 މިލިއަން ރުފިޔާގެ އަގުހުރި މަސްތުވާތަކެތި މޯލްޑިވްސް ކަސްތަމްސް ސާވިސްއިން އަތުލައިގަނެފިއެވެ.

ކަސްޓަމްސްއިން ބުނީ މިއަދު އަތުލައިގަތް އެ މަސްތުވާ ތަކެތީގައި 3.5 ކިލޯ ހުންނާނެ ކަމަށާއި، މިތަކެތި އަތުލައިގަނެފައިވަނީ، މިދިޔަ ބުދަދުވަހު ކަނޑުމަގުން ރާއްޖެއައި ޝިޕްމަންޓެއް ބަލާފާސްކުރުމުގެ ތެރެއިންކަމަށެވެ. އަތުލައިގަތް މަސްތުވާތަކެތީގެ ތެރޭގައި ހިމެނެނީ، 2،138ގ މެތަމްފެޓަމިން އާއި 1،086ގ ކެޓަމިންގެ އިތުރުން 310ގ ހެރޮއިންނެވެ.

މި މައްސަލަ އިތުރަށް ތަހުގީގު ކުރުމަށްޓަކައި، ކަސްޓަމްސްއިން ވަނީ މި މައްސަލަ ފުލުހުންނާ ހަވާލުކޮށްފައެވެ. 

ކަނޑުމަގުން އެތެރެކުރަން އުޅުނު މަސްތުވާ ތަކެތީގެ ޝިޕްމަންޓެއް އަތުލަގަނެފައިވާއިރު، މި ފަހަކުން ވަނީ، އިންޑިއާއިން ދިވެހިރާއްޖެއަށް ގެންނަން އުޅުނު 3.7 މިލިއަން ޑޮލަރު (58 މިލިއަން ރުފިޔާ) މަސްތުވާތަކެތި އިންޑިއާ ކޯސްޓް ގާޑާއި ޑައިރެކްޓަރޭޓް އޮފް ރެވެނިއު އިންޓެލިޖެންސް (ޑީއާރްއައި) ގުޅިގެން ހިންގި އޮޕަރޭޝަނެއްގައި އަތުލައިގަނެފައެވެ. މި އޮޕަރޭޝަން ކުރިއަށްގެންގޮސްފައިވަނީ މިމަހގެ 5 ވަނަ ދުވަހުކަމަށް އިންޑިއާގެ ނޫސްތަކުން ވަނީ ބުނެފައެވެ.