ރާއްޖޭގައި ވޭޕު މަނާކުރި ސަބަބު އޮޅުވާލާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލުންނާއި ގުޅުވާ ދޮގު ވާހަކަތަކެއް, އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ) ރޭ އޮތް އެމްޑީޕީގެ މަގުމަތީ އިހްތިޖާޖުގައި ވާހަކަ ދައްކައިފި އެވެ.
މަންދީ އަކީ މަޖިލީސް މެންބަރު މީކާއީލް ނަސީމްގެ މަންމަ އެވެ.
ރޭ އޮތް އެމްޑީޕީގެ މަގުމަތީ އިހުތިޖާޖުގައި ވާހަކަ ދައްކަމުން އޭނާ ވަނީ ދިވެހި ޒުވާނުންގެ ހައްގުގައި ކަމަށް ބުނެ ރައީސްގެ ދަރިކަލުންނާއި ގުޅޭގޮތުން ދޮގު ވާހަކަތަކެއް ދައްކާފަ އެވެ. އޭނާ ބުނީ ދިވެހި ޒުވާނުންނަށް "ބިޑި އޮޅަން ޖެއްސީ" ރައީސްގެ ދަރިކަލުން ވޭޕު ކުރަން ފެށުމުން އެކަން ހުއްޓުވަން ކަމަށެވެ. އަދި "އަމިއްލަ ދަރިފުޅު ފުރަތަމަ ބަލަންވީނޫހޭ" ކިޔާ އަޑުގަދަކޮށްފައިވެ އެވެ.
"ދިވެހި ޒުވާނުން މި ތިބެނީ ކަންކަންމަތީގައި ބިޑި އޮޅަން. ލަދުން ބޯހަލާކެއް ނުވޭތޯ. އެ މީހުންނަށް މިހާރު ނޭންގޭ މި ބޮވެނީ ކޯއްޗެއް ކަމެއް ވެސް," އޭނާ ބުނެފައިވެ އެވެ.
އޭނާ މި ވާހަކަތައް ދެއްކީ އެ ވަގުތު އިސްލާމިކް ޔުނިވާސިޓީގައި ރީތި ރާގުތަކަށް ޤުރުއާން ކިޔެވުމާ ޤުރުއާނުގެ ޢިލްމު ފެތުރުމުގެ ޕްރަގްރާމް އިފްތިތާހު ކުރުމަށް ރައީސްގެ އަނބިކަނބަލުން ވަޑައިގެންނެވި ވަގުތާ ދިމާކޮށެވެ. ރޭގެ އެ ޕްރަގްރާމަށް ހުރަސް އެޅޭ މިންވަރަށް އެމްޑީޕީގެ ސަޕޯޓަރުން އަޑުގަދަކުރި އެވެ.
ސިޔާސީ ވެގެން ގޮސް ކުޑަކުދީންނާއި ގުޅޭގޮތުން ދޮގު ވާހަކަތައް ފަތުރާ ހިސާބަށް ކަންކަން ގެންދިއުމުން ވަރަށް ގިނަ ބަޔަކު ދަނީ ސޯޝަލް މީޑިއާގައި މަންދީއަށް ފާޑުކިޔަމުންނެވެ. ސިޔާސީ ވިޔަސް މީހުންގެ އަނބިދަރީންނާއި ނުބެހި ވާހަކަ ދެއްކޭނެ ކަމަށާ އެފަދަ މީހުންނަށް ފިޔަވަޅު އަޅަން ޖެހޭ ކަމަށް ބައެއް މީހުން ބުނެފައިވެ އެވެ.
Advertisement
This content is created and paid for by advertisers and does not involve Voice Journalists
