މުޒާހަރާ ކުރުމުގައި އާންމުންނަށާއި ޓްރެފިކަށް ދަތިނުވާނޭގޮތަކަށް މުޒާހަރާގެ ހަރަކާތްތައް އިންތިޒާމްކޮށްގެން ކުރިއަށްގެންދިއުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ގޮވާލައިފިއެވެ.

އިދިކޮޅު އެމްޑީޕީން ސަރުކާރުގެ ސިޔާސަތްތަކާ ދެކޮޅަށް މިހާރު ކުރަމުންދާ މުޒާހަރާއާ ގުޅިގެން އެޗްއާރުސީއެމުން ނެރުނު ނޫސްބަޔާނުގައި ބުނެފައިވަނީ، މާރޗްމަހުގެ 7 ވަނަ ދުވަހުން ފެށިގެން އެމްޑީޕީން މާލޭގައި ކުރިއަށްގެންދާ ސިލްސިލާ މުޒާހަރާތައް އެ ކޮމިޝަނުގެ ފަރާތުން މޮނިޓަރކުރަމުން ގެންދާކަމަށެވެ.

މުޒާހަރާތައް ރާވާ ކުރިއަށްގެންދިއުމުގައި އާންމުންނަށާއި ޓްރެފިކަށް ދަތިނުވާނޭހެން މުޒާހަރާގެ ހަރަކާތްތައް އިންތިޒާމްކުރަން ޖެހޭކަން ފާހަގަކުރަމުން އެޗްއާރުސީއެމުން ބުނީ، އެއްވުމުގައި ބައިވެރިވި ފަރާތްތަކުން އަޑުގަދަކުރާ ބޭނުންކޮށް، މާލޭގެ މަގުތަކާއި ގްރީންޒޯން ހިމެނޭ ސަރަހައްދުތަކަށް ވަންނަން މަސައްކަތްކޮށްފައިވާކަމަށެވެ. އަދި އެ ސަރަހައްދުތަކަށް ވަނުމަށް އުޅުނު ފަރާތްތައް ހުއްޓުވުމަށް ބައިވެރިންނާ ފުލުހުން ކުރިމަތިލާފައިވާކަން ފާހަގަކުރެވިފައިވާ ކަމަށާއި، މި ކުރިމަތިލުންތަކުގައި މުޒާހަރާގެ ބައިވެރިންނަށް އެކިވަރުގެ އަނިޔާތައް ލިބިފައިވާކަން ފާހަގަކުރެވިފައިވާކަމަށެވެ.

Advertisement

އެޗްއާރުސީއެމުން ބުނީ މުޒާހަރާކުރުމުގައި ސުލްހަވެރިކަން އިސްކޮށް އަދި މަގުތައް ބޭނުންކުރާ ފަރާތްތަކަށް ދަތިނުވާނޭގޮތަށް އަމަލުކުރުމަށް މުޒާހަރާގެ ބައިވެރިންނަށް އިލްތިމާސްކުރާ ކަމަށެވެ. މީގެ އިތުރުން މުޒާހަރާގައި ހަރަކާތްތެރިވާ މީޑިއާގެ ފަރާތްތަކުންވެސް މުޒާހަރާތައް ކަވަރު ކުރުމުގައި އަމަލުކުރަންޖެހޭ މިންގަނޑުތައް ހިފެހެއްޓުމަށް އިލްތިމާސްކުރާކަން ފާހަގަކުރަމުން އެޗްއާރުސީއެމުން ބުނީ، ސުލްހަވެރިކޮށް ބޭއްވޭ އެއްވުންތައް ބެއްވުމަށް ފުރުސަތުދީޫ އެއްވުންތައް ރޫޅާލަންޖެހޭ ހާލަތްތަކުގައި ޤާނޫނު ތަންފީޒުކުރާ އިދާރާތަކުން ޤާނޫނީ އިމުގެ ތެރެއިން އެއްވުންތައް ރޫޅާލުމަށް އިލްތިމާސްކުރާ ކަމަށެވެ.

އެޗްއާރުސީއެމުން ބުނީ، ޤާނޫނު އަސާސީން ލިބިދީފައިވާ އެއްވެއެުޅުމުގެ މިނިވަންކަމުގެ ހައްޤާއި ހިޔާލުފާޅުކުރުމުގެ  މިނިވަންކަމުގެ ހައްޤު ރައްޔިތުންނަށް ލިބިދީފައިވާއިރު، ގައްޤު ބޭނުންކުރުމުގައި އެއްބަޔަކު އަނެއްބައެއްގެ ހައްޤަށް އަރައިނުގަނެ އެކަކު އަނެކާގެ ކަރާމާތާއި، އަބުރަށް އަރައި ނުގަނެ، ހައްޤުތައް ބޭނުންކުރުމާއި އެކަކު އަނެކާގެ ހައްޤުތަކަށް އިހުތިރާމްކުރުމަކީ މުޖުތަމައުގެ ހަމަޖެހުމަށްޓަކައި މުހިންމުކަމެއް ކަމަށެވެ.