ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަދި އެމަނިކުފާނުގެ އަނބިކަނބަލުން ސާޖިދާ މުހައްމަދުގެ ދަރިކަލުންނާ ގުޅުވައިގެން އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ)، ފައްޔާޒް އިސްމާއީލް ދެއްކެވި، ވާހަކަތަކަށް މަދަނީ ދައުވާކުރުމަށް ނިންމައިފިއެވެ.

އެމްޑީޕީން ފަށާފައިވާ ސިލްސިލާ މުޒާހަރާތަކުގެ ތެރެއިން މިދިޔަ ބުދަދުވަހުގެ ރޭ ކުރި މުޒާހަރާގައި އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ) ވަނީ، ރާއްޖޭގައި ވޭޕު މަނާކުރި ސަބަބު އޮޅުވާލާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލުންނާއި ގުޅުވާ ދޮގު ވާހަކަތަކެއް ދައްކާފައެވެ. 

މިކަމާ ގުޅޭގޮތުން ރައީސްގެ ދެކަނބަލުންގެ އާއިލާގެ ފަރާތުން މައްސަލާގައި ވަކާލާތުކުރައްވާ އިސް ލޯޔަރު އަދި ކުރީގެ ބަންޑާރަ ނައިބު އާއިޝަތު އާޒިމާ ޝަކޫރު މިއަދު ވަނީ ދަރިކަލުންގެ މަންމަގެ ހައިސިއްޔަތުން މެޑަމް ސާޖިދާގެ ބަޔާނެއް އިއްވާފައެވެ. މި ބަޔާނުގައި ސާޖިދާ ވިދާޅުވީ، މި މައްސަލަ ޝަރުޢީ ގޮތެއްގައި ބެލުމަށް ނިންމީ އެކުދިންގެ ނަމާއި ކަރާމަތްނަގާލައި، ކުޑަކުއްޖަކަށް ވީތީ ލިބިފައިވާ ރައްކާތެރިކަން ނަގާލުމުން، އެކުދިންގެ މަންމަގެ ހައިސިއްޔަތުން ފިޔަވަޅުތަކެއް އެޅުމުގެ ގޮތުންކަމަށެވެ.

ކުދިންގެ ރައްކާތެރިކަމާއި މުސްތަޤްބަލު ކަށަވަރުކުރުމަކީ އެކުދިންގެ ބައްޕައާއި މަންމަގެ ޒިއްމާއެއްކަން ފާހަގަކުރައްވަމުން ސާޖިދާ ވިދާޅުވީ މިފަހަކަށް އައިސް ދިވެހިރާއްޖޭގެ ސިޔާސީ މައިދާނުގައި ޢާއިލާތަކުގެ ނަމާއި އަބުރުނަގާލައި، ކަމާނުބެހޭ މަޢުޞޫމް ޅަދަރިންގެ ކަރާމާތާއި ރައްކާތެރިކަން ނަގާލުމުގެ ޢަމަލުތަކެއް ހިނގަމުންދާކަމަށެވެ. އެގޮތުން ދުވަހެއް ދުވަހަކަށް މިކަން ގޯސްވަމުންދާއިރު، މިއަދު މި ފިޔަވަޅު އެޅުމަކީ މުސްތަޤްބަލުގައި މި ފަދަ މަޤާމެއްގައި ތިބޭނޭ ކުދިންގެ ރައްކާތެރިކަމަށްޓަކައިވެސް ކުރަންޖެހޭ ކަމެއްކަމަށް ޤަބޫލުކުރާކަމަށް މެޑަމް ސާޖިދާ ވިދާޅުވިއެވެ.

ސާޖިދާ ވިދާޅުވީ، މި މައްސަލާގައި ޤާނޫނީގޮތުން ކުރިއަށްދާން ނިންމީ ވާހަކަތައް ރައްދުވާ ކުދިންގެ މަންމަގެ ޙައިޞިއްޔަތުން ފަރުދީގޮތުންކަމަށެވެ. އަދި މިކަމުގައި ސަރުކާރުގެ ބައިވެރިވުމެއް ނޯންނާނެ ކަމަށާއި، ބޭނުމަކީ އަޅުގަނޑުމެން އެންމެންގެ ކުދިންނަށް ރައްކާތެރިކަމާއެކު ދިރިއުޅެވޭނޭ މާޙައުލެއް ޤާއިމުވުންކަމަށެވެ.

މައްސަލައާ ގުޅޭގޮތުން ވަކީލާ އާޒިމާ ވިދާޅުވީ ދަރިކަލުންނާ ގުޅޭގޮތުން އަސްލެއްނެތް ވާހަކަތަކެއް ދައްކާފައިވާތީވެ، އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ)، ފައްޔާޒް އިސްމާއީލް އަދި އެމްޑީޕީއާ ދެކޮޅަށް މަދަނީގޮތުން ދައުވާ ކުރުމަށް ނިންމާފައިވައިރު، މި މައްސަލަ އިތުރަށް ދިރާސާކޮށް މިކަމުގައި އިތުރު ފަރާތްތަކާމެދު ދައުވާކުރަން ޖެހޭނަމަ އެކަން ކުރިއަށްދާނޭކަމަށެވެ.