މަސްވެރިކަމާ ގުޅޭ ބައެއް މަޝްރޫއުތައް ކުރިއަށް ގެންދިޔުމަށް 64.65 މިލިއަން ޑޮލަރުގެ ފައިނޭންސިން ހޯދަން އިސްލާމިކް ޑިވޮލޮޕްމަންޓް ބޭންކް (އައިޑީބީ)އަށް ހުށަހަޅާފައިވާ ކަމަށް ސަރުކާރުގެ މަސް ކުންފުނި، މިފްކޯއިން މިއަދު ބުނެފިއެވެ.

މިފްކޯއިން މިއަދު ނެރުނު ބަޔާނެއްގައި ބުނީ، ސަރުކާރުގެ އެހީއާ އެކު 64.65 މިލިއަން ޑޮލަރު (ގާތްގަނޑަކަށް 997 މިލިއަން ރުފިޔާ) ފައިނޭންސިން ހޯދަން އިސްލާމިކް ޑިވޮލޮޕްމަންޓް ބޭންކަށް ހުށަހަޅާފައިވާ ކަމަށެވެ.

މި ލޯނަށް ހުށަހަޅުމުގެ ކުރިން ކުރިއަށްގެންގޮސްފައިވާ މަޝްވަރާތަކުގައި ލޯނު ހަމަޖެހޭނެކަމުގެ ޔަޤީންކަން އެބޭންކުން ދީފައިވާކަމަށް މިފްކޯއިން ބުނެފައުވެއެވެ.

މިގޮތުން ހޯދާ ފައިސާއިން ކުރިއަށް ގެންދިޔުމަށް ނިންމާފައިވާ މަޝްރޫއު ތަކަކީ:

1) ހއ. އިހަވަންދޫގައި 1،000 މެޓްރިކް ޓަނުގެ ކޯލްޑް ސްޓޯރޭޖް އަދި 50 މެޓްރިކް ޓަނުގެ ބްރައިން ފްރީޒިން ގާއިމުކުރާން

2) އައްޑޫ ސިޓީގައި 500 މެޓްރިކް ޓަނުގެ ކޯލްޑް ސްޓޯރޭޖް އަދި 50 މެޓްރިކް ޓަނުގެ ބްރައިން ފްރީޒިން ގާއިމުކުރުން

3) ކަނޑުއޮތްގިރީގައި ހުރި ފެސިލިޓީއަށް 35 މެޓްރިކް ޓަނުގެ ފިޝް ޕްރޮސެސިން ޔުނިޓެއް ގާއިމުކުރުން

4) ފެލިވަރުގައި 250 ޔުނިޓުގެ އެކޮމަޑޭޝަން ބްލޮކެއް ގާއިމުކުރުން

5) ކޫއްޑޫގައި 100 ޔުނިޓުގެ އެކޮމަޑޭޝަން ބްލޮކެއް ގާއިމުކުރުން

6) މުވައްޒަފުން ތަމުރީނުކުރާނެ10 އަހަރުގެ ބިޒްނަސް ޕްލޭނެއް ހަދާނެ

އެ ކުންފުނިން ބުނީ، މަޝްރޫއު ކުރިއަށް ގެންދާނީ އައިޑީބީގެ އެހީގައި މަޝްރޫއުތައް ކުރިއަށް ގެންދަން ކަނޑައަޅާފައިވާ އުސޫލުތަކުގެ ދަށުން ވާދަވެރި ބިޑިންގެ ތެރެއިން ކަމަށެވެ.