ދިވެހިން އާއްމުކޮށް ކެއުމުގައި ބޭނުންކޮށް އުޅޭ މަހުގެ ބާވަތްތަކުގެ ތެރެއިން މާނިޔާމަހަކީ ދިވެހިންނަށް ވަރަށް ހާއްސަ މަހެކެވެ. ދިވެހިންނަށް މާނިޔާމަސް ހާއްސަވާ ވަރަށްގިނަ ސަބަބުތަކެއް އެބަހުއްޓެވެ. މަސްވެރިކަމުގައި އެންމެ ފަސޭހައިން ބޭނޭމަހެއްގެ ގޮތުގައި އެންމެގިނަ ބަޔަކު ފާހަގަކުރާ މަހަކީ މާނިޔާ މަހެވެ. 

މި ރޯދަމަހު މާލޭ މަސްމާރުކޭޓުގައި ކޮންމެ ދުވަހަކުވެސް އެންމެ ގިނައިން ވިއްކަންހުރި އެއްބާވަތަކަށް ހަމަޔަގީނުންވެސް މާނިޔާމަސް ވާނެއެވެ. ރޯދަމަހު ކޮންމެ ދުވަހަކުވެސް ދޯނިތަކުން މާރުކޭޓަށް މާނިޔާމަސް ގެނެއެވެ. އެ ހުރިހާމަހެއް ކޮންމެ ދުވަހަކުވެސް ވިކި ހުސްވާކަން މަސްވިއްކާ ފަރާތްތަކުން ފާހަގަކުރެއެވެ.

"މިއަދުވެސް 50 މަސް ގެނެސްގެން ވިއްކައިފިން. އެންމެ ފަހު އެތިކޮޅު މިހިރީ. މަހުގެ އަގުވެސް ރަނގަޅު. މަހުގެ އަގުތައް މިހިރީ 60 ރުފިޔާ އާއި 80 ރުފިޔާ އާ ދެމެދުގެ އަގެއްގައި" މާރުކޭޓުގައި މަސްވިއްކަން އިން މީހަކު ބުންޏެވެ.

މާނިޔާ މަހަކީ މާރުކޭޓުގައި ރަނގަޅު އަގެއްގައި ވިކޭ އެއްޗެކެވެ. ރޯދަމަހު މާނިޔާ މަހުގެ ވިޔަފާރި އަދިވަކިން ރަނގަޅުކަމަށް ފަރުމަސް ވިއްކާ ފަރާތްތަކުން ބުނެއެވެ. މި ރޯދަމަހުގެ މިހާހިސާބަށް އާއިރު އެންމެގިނައިން ވިއްކުނު އެއް ބާވަތަކީ މާނިޔާމަސް ކަން އެފަރާތްތަކުން ފާހަގަކުރެއެވެ.

މަސްމާރުކޭޓުގައި ވިއްކަން ބަހައްޓާފައިހުރި މާނިޔާމަސްތަކެއް... ފޮޓޯ: ވޮއިސް

ދިވެހިން ކައިއުޅޭ މަހުގެ ބާވަތްތަކަށް ބަލާއިރު، މާނިޔާމަސް ފާހަގަކޮށްލެވެއެވެ. ސަބަބަކީ މާނިޔާމަހަކީ ފަރުމަހުގެ އަދި ކަނޑުމަހުގެ ގޮތުގައިވެސް ދިވެހިން ބަލައިގަންނަ މަހަކަށްވާތީއެވެ. ފަރުމަހުގައި ވަސް ހުންނާތީވެ، ފަރުމަސް ކެއުމަށް ބޭނުންނުވާ މީހުން އާއްމުކޮށް ކައިއުޅޭ މަހުގެ ތެރޭގައި މާނިޔާމަސް ހިމެނެއެވެ. 

މާނިޔާމަސް... ފޮޓޯ: ވޮއިސް

މާނިޔާމަހަކީ ގަރުދިޔަ ކެއްކައިގެން ކެއުމަށް ވަރަށް މީރު މަހެކެވެ. މީގެ އިތުރުން ފިހުމަށްވެސް ވަރަށްގިނަ މީހުން މާނިޔާމަސް ބޭނުންކުރެއެވެ. ހާއްސަ ގޮތެއްގައި ރޯދަމަހު އެންމެ ގިނަ މީހުން ފިހުމަށް ބޭނުންކުރާ އެއް ބާވަތަކީ މާނިޔާ މަހެވެ. ސަބަބަކީ ބާޒާރުން އެންމެ ފަސޭހައިން ގަންނަން ލިބުމުގެ އިތުރުން ކެއުމުގައި ބޭނުންކުރަންވެސް ފަސޭހަވުމެވެ. އެހެން މަސްމަހާ ހިލާފަށް މާނިޔާމަހަކީ މަސްގަނޑު ބޯ، އަދި ކަށިނެގުމުގައި ވަރަށް ފަސޭހަ މަހެކެވެ. ދިވެހިން ލޮނުމަސް އެޅުމުގައިވެސް އެންމެގިނައިން ބޭނުންކޮށް އުޅުނު އެއް ބާވަތަކީ މާނިޔާ މަހެވެ.