މަރުކަޒީ ބޭންކް، އެމްއެމްއޭގެ ޑެޕިއުޓީ ގަވަރުނަރުގެ މަޤާމުން އަަޙްމަދު އިމާދު އިސްތިއުފާދެއްވައިފިއެވެ.

އިމާދު އިސްތިއުފާ ދެއްވާފައި ވަނީ، އޭނާ މަޤާމުން ވަކިކުރުމަށް ރައީސުލްޖުމްހޫރިއްޔާއަށް މަޝްވަރާ ދިނުމާ ގުޅޭ މައްސަލަ، ކޮމިޓީއަށް ފޮނުވަން މިއަދުގެ މަޖިލިސް ޖަލްސާއަށް އެޖެންޑާކޮށްފައި ވަނިކޮށެވެ.

މަގާމުން އިސްތިއުފާދެއްވިކަން ހާމަކުރައްވައި އަަޙްމަދު އިމާދު ފޮނުއްވި ސިޓީގައި އޭނާ ވަނީ އެމަޤާމުގައި ހުންނަވައިގެން ކުރައްވާފައިވަނީ ޝަރަފުވެރި މަސައްކަތްތަކެއް ކަމަށެވެ. އެގޮތުން ބޭރު ފައިސާ އާއި ގުޅޭ ޤާނޫނާއި ގަވާއިދުގެ މަސައްކަތް އޭނާ ފާހަގަކުރެއްވިއެވެ.

Advertisement

މީގެ އިތުރުން އޭނާ ވަނީ ފިސްކަލް ޒިންމާދާރުކަމަށް އިސްކަންދީ އެމްއެމްއޭގެ މިނިވަންކަން ހިމާޔަތްކުރުމަށާ، މެކްރޯ އިކޮނޮމިކް ހަރުދަނާކަން ޔަގީންކުރުމަށް ބޭނުންވާ ފިޔަވަޅުތައް އަޅަން ސަރުކާރުގެ ކިބައިން އެދިފައެވެ.

އަދި ފައިސާ ޗާޕު ކުރުމާ ދެކޮޅަށް ގިނަ ކަންކަން ފާހަގަކުރައްވައި، ފައިސާ ޗާޕުކޮށްފިނަމަ އެކްސްޗޭންޖް ރޭޓު ހިފަހައްޓަން ކުރާ މަސައްކަތަށް ގޮންޖެހުން ކުރިމަތިވާނެކަމަށާ، ރުފިޔާގެ ލިކިއުޑިޓީ މެނޭޖްކުރުމަށް މިހާރު ވެސް ކުރަންޖެހިފައިވާ ޚަރަދު އިތުރުވެ އެމްއެމްއޭގެ ބެލެންސް ޝީޓު ހީނަރުވާނެކަަމަށް ވިދާޅުވިއެވެ. 

ޑެޕިއުޓީ ގަވަރުނަރުކަމަށް އިމާދު އައްޔަންކުރީ މިދިޔަ ސަރުކާރުގައި 2020 ވަނަ އަހަރެވެ. އޭނާ އެމްއެމްއޭގައި ޚިދުމަތް ފެއްޓެވީ 2000 ވަނަ އަހަރުން ފެށިގެންނެވެ.

އިމާދު ވަކިކުރަން މަޖިލީހުގެ ޕީއެންސީ އަށް ނިސްވަތްވެވަޑައިގަންނަވާ ދިއްދޫ ދާއިރާގެ މެންބަރު އަބްދުއްލަތީފް ހުށައެޅުއްވި މައްސަލާގައި ވަނީ، އެމްއެމްއޭގެ ކުރީގެ ގަވަރުނަރު ޢަލީ ހާޝިމް، ގާނޫނުން މަތިކޮށްފައިވާ ޒިންމާތައް އަދާނުކުރައްވާ ހުންނެވިއިރު، އެކަންކަން ފާހަގަކުރުމަށްޓަކައި ގާނޫނުން މަތިކޮށްފައިވާ ޒިންމާތައް އަދާކުރުމަށް ޑެޕިއުޓީ ގަވަރުނަރު އިމާދުވެސް އެއްވެސް މަސައްކަތް ކޮށްފައިވާކަން އެނގެން ނެތްކަމަށެވެ.

އެހެންކަމުން ގާނޫނުން އޭނާއަށް ލާޒިމްކޮށްފައިވާ ޒިންމާތައް އަދާކުރުމުގައި ފަސްޖެހިފައިވާތީ އޭނާ މަގާމުން ވަކި ކުރުމަށް ރައީސުލްޖުމްހޫރިއްޔާއަށް ހުށަހަޅަން ނިންމެވީކަމަށެވެ.