ކުޑަކުދިންގެ އަބުރާއި ކަރާމާތް ނުގެއްލޭ ގޮތަށް ކޮންޓެންޓު ފޮނުވަން ބްރޯޑްކާސްޓިން ކޮމިޝަނުން އިލްތިމާސްކޮށްފި އެވެ.

އެ ކޮމިޝަނުން މިއަދު ނެރުނު ސާކިއުލާއެއްގައި ވަނީ ބްރޯޑްކާސްޓްކުރުމުގެ ލައިސަންސް ދޫކޮށްފައިވާ ހުރިހާ ބްރޯޑްކާސްޓަރުން ފޮނުވާ ކޮންޓެންޓަކީ ރާއްޖޭގެ ޤާނޫނުތަކާއި އާއްމު އިޖުތިމާޢީ މިންގަނޑަށާއި ނޫސްވެރިކަމުގެ އަޚްލާޤީ މިންގަނޑަށް ފެތޭގޮތަށް ހުންނަ ކޮންޓެންޓް ކަމުގައި ހެދުމަށް އިލްތިމާސްކޮށްފައެވެ. 

ވަކިން ހާއްސަކޮށް 'ބްރޯޑްކާސްޓް ކުރުމުގައި ކުޑަކުދިން ހިމާޔަތް ކުރުމުގައި އަމަލުކުރަންވީ ގައިޑްލައިން'ގެ ހަމަތަކާ އެއްގޮތަށް ކުޑަކުދިންގެ ކަރާމާތާއި އަބުރުވެރިކަން ނުގެއްލޭ ގޮތަށް ކޮންޓެންޓު ފޮނުވުމަށް ބްރޯޑްކާސްޓަރުން ސަމާލުވުމަށް އެ ކޮމިޝަނުން ވަނީ އެދިފައެވެ. 

މިއާއެކު ބްރޯޑްކޮމުން ވަނީ ހުއްދަ ދޫކޮށްފައިވާ ހުރިހާ ތަނަކުން ފޮނުވަނީ ރާއްޖޭގެ ގާނޫނުތަކާއި ގަވައިދު އަދި އާއްމު އިޖުތިމާއީ މިންގަނޑާއި ނޫސްވެރިކަމުގެ އަހުލާގީ މިންގަނޑަށް ފެތޭ ކޮންޓެންޓަށް ހެދުމަށް އިލްތިމާސްކޮށްފަ އެވެ.

ބްރޯޑްކޮމް އިން މިފަދަ ބަޔާނެއް ނެރެފައި މިވަނީ، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުގެ ފިރިހެން ދަރިކަލުންނާއި ގުޅުވައި، ހަގީގަތާއި ޚިލާފް ދޮގު ވާހަކަތަކެއް އެމްޑީޕީގެ އިހްތިޖާޖެއްގެ ތެރެއިން އެ ޕާޓީގެ އެކްޓިވިސްޓަކު ދައްކައި އެ އިހްތިޖާޖު ބައެއް ޓީވީތަކުން ލައިވް ކޮށްފައިވާ ދަނޑިވަޅެއްގައެވެ. 

ކުޑަކުައްޖަކާއި ގުޅުވައި، އެމްޑީޕީ މުޒާހަރާ ތެރެއިން އެކްޓިވިސްޓް ދެއްކި ވާހަކަތަކާއި ގުޅިގެން ގިނަ ބަޔަކު އަންނަނީ އޭނައަށް ފާޑުކިޔަމުންނެވެ. އަދި އެކަން ކުށްވެރިކޮށް މުވައްސަސާ ތަކުން ވަނީ ބަޔާންވެސް ނެރެފައެވެ.