ބިންވެރިޔާ ސްކީމާ ގުޅޭ ގޮތުން އެޗްޑީސީން ކުރިއަށްގެންދިޔަ އިންޓަރނަލް އޮޑިޓްގައި ފާހަގަވި މައްސަލަތައް ފުލުހުންނަށް ހުށަހަޅައިފިއެވެ.
މިކަމާ ގުޅޭގޮތުން އެޗްޑީސީން ބުނީ 'ބިންވެރިޔާ' ސްކީމުގެ ދަށުން ހުޅުމާލެ އިން ދޫކޮށްފައިވާ ބިންތަކުގެ އިމާރާތްކުރުމުގެ ހުއްދައަށް އެދޭ އިރު އެއްބިމަކަށް އެއް ފަރާތަށް ވުރެ ގިނަ ފަރާތްތަކުން ޢިމާރާތްކުރުމުގެ ހުއްދައަށް އެދި މި ކޯޕަރޭޝަނަށް ހުށަހަޅަމުންދާތީ، އެކަން މި ކޯޕަރޭޝަނުގެ ސަމާލުކަމަށް އައިސް، އެކަން އިތުރަށް ބަލައި އެކަމާއި ގުޅިގެން އަޅަންޖެހޭ ފިޔަވަޅުތައް އަޅަމުންދާކަމަށެވެ.
އެޗްޑީސީން ވަނީ 'ބިންވެރިޔާ' ސްކީމްގެ ދަށުން ހުޅުމާލެއިން ދޫކުރެވުނު ބިންތަކާއި ގުޅޭގޮތުން ޚާއްޞަ އޮޑިޓެއްކޮށްފައެވެ. އެޗްޑީސީން ބުނީ އެ ކުންފުނިން ކުރި މި އޮޑިޓުން ބިންވެރިޔާ ސްކީމްގެ ތެރެއިން އިތުރު މައްސަލަތަކެއް ފެނިފައިވާތީވެ، އެ މައްސަލަތައް އިތުރަށް ތަޙްޤީޤު ކުރުމަށްޓަކައި، ފުލުހުންނަށް ހުށަހަޅާފައިވާކަމަށެވެ.
އެޗްޑީސީން ބުނީ ކުރިއަށް އޮތްތަނުގައިވެސް މިފަދަ މައްސަލަތައް ބަލައި ކަންކަން ފާހަގަވަމުންދާނަމަ ހަމަޖެހިފައިވާ އުސޫލުގެމަތިން ފިޔަވަޅުތައް އަޅަމުންދާނޭ ކަމަށެވެ. އެޗްޑީސީން މަސައްކަތްކުރަމުންދާނީ ހުރިހާ ރައްޔިތުންގެ ލާބައާ މަންފާއަށް އަދި ނަޒާހަތްތެރިކަމާއެކު ކަންކަން ކުރުމަށް ކަމަށްވެސް އެޗްޑީސީން ބުނެއެވެ.
ބިންވެރިޔާ ސްކީމާ ގުޅޭގޮތުން އެޗްޑީސީން ކުރިއަށްގެންދިޔަ އޮޑިޓުގައި ފާހަގަވި މައްސަލަތައް ފުލުހަށް ހުށަހަޅާފައިވާއިރު، ޕީޖީ އަންގަވައިގެން ފުލުހުންގެ މުއައްސަސާއިން މިހާރުވެސް ގެންދަނީ ގެދޮރުވެރިޔާ ސްކީމުގެ ޖިނާޢީ ތަހުގީގެއް ކުރަމުންނެވެ. އެގޮތުން މައްސަލައިގެ ތަޙުޤީޤު ހިނގަމުންދާ ގޮތް، ކޮންމެ ހަފްތާއަކު 1 ފަހަރު ޕްރޮސިކިއުޓަރ ޖެނެރަލްއާ ޙިއްޞާކުރަމުން ގެންދިއުމަށްވެސް ޕީޖީއޮފީހުން ވަނީ މިދިޔަ ޑިސެމްބަރުމަހު އަންގާފައެވެ.
Advertisement
This content is created and paid for by advertisers and does not involve Voice Journalists
