ކެންސަރަށް މަގުފަހިވާ ކެމިކަލްއެއް ހުރެގެން ހަމުގެ ކްރީމްތަކެއް އެމެރިކާގައި ވިއްކުން ހުއްޓުވައިފިއެވެ. 

އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން އަންގާރަ ދުވަހު ނެރުނު އިއުލާނެއްގައި ވަނީ، ކެންސަރަށް މަގުފަހިވެދާނެ ކެމިކަލްއެއް ކަމަށްވާ ބެންޒީން މަތީ މިންވަރަކަށް ހުރުމާ ގުޅިގެން، ވޯލްގްރީންސް، ލަ ރޯޝް-ޕޮސޭ އަދި ޕްރޯއެކްޓިވް ފަދަ ބްރޭންޑްތަކުގެ ހަމުގެ ކްރީމްތަކެއް ވިއްކުން ހުއްޓުވައިފައެވެ. 

މިގޮތުން މަނާ ކޮށްފައިވަނީ ވޯލްގްރީންސް އެކްނީ ކޮންޓްރޯލް ކްލީންސަރ، ޕްރޯއެކްޓިވް ސްކިން ސްމޫދިންގ އެކްސްފޯލިއޭޓަރ، އެސްއެލްއެމްޑީ ބެންޒޯއިލް ޕެރޮކްސައިޑް އެކްނީ ލޯޝަން އަދި ލަ ރޯޗް-ޕޮސޭ އެފަކްލަރ ޑުއޯ ޑުއަލް އެކްޝަން އެކްނީ ޓްރީޓްމަންޓް ފަދަ ބާވަތްތަކެވެ.

އެފްޑީއޭ އިން ބުނާ ގޮތުގައި މި ބާވަތްތައް ވިއްކުން މަނާކުރީ "ބެންޒީން ކޮންޓެމިނޭޝަންގެ" ފުރުސަތު އޮތުމާ ގުޅިގެންނެވެ.

އެމެރިކާގެ ސެންޓަރސް ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން ބުނާ ގޮތުގައި ބެންޒީންއަކީ އެމެރިކާގައި ޑިޓަރޖެންޓް، ޑައި އަދި ބޭސް ފަދަ އެތައް އުފެއްދުންތަކެއް އުފެއްދުމަށް ބޭނުންކުރާ ކެމިކަލްއެކެވެ. ދިގު މުއްދަތަކަށް މަތީ މިންވަރަކަށް ބެންޒީނަށް މީހާ އެކްސްޕޯސްވުމުން ލިއުކީމިއާ ނުވަތަ ލޭ އުފައްދާ ގުނަވަންތަކުގެ ކެންސަރު ޖެހުމުގެ ފުރުސަތު އޮވެއެވެ.

އެފްޑީއޭގެ މި އެންގުމަކީ ހަމައެކަނި ރީޓެއިލް ފެންވަރުގައި ކުރާ އެންގުމެކެވެ. އެ ގޮތުން، ފިހާރަތަކުގެ ހަރުތަކުންނާއި އޮންލައިން މާކެޓްޕްލޭސްތަކުން މި ބާވަތްތައް ނެގުމަށް އެފްޑީއޭ އިން ވަނީ އެދިފައެވެ. ނަމަވެސް، އެ ޕްރޮޑަކްޓް ބޭނުންކުރުން މަނާކޮށްފައެއް ނުވެއެވެ. 

މިކަމާއި ގުޅިގެން ލާ ރޯޝް-ޕޮސޭގެ ތަރުޖަމާނަކު އެމެރިކާގެ ”އޭބީސީ ނިޔުސް“އަށް ބުނިގޮތުގައި އެ ކުންފުނީގެ އެފެކްލަ ޑުއޯ ޑުއަލް އެކްޝަން އެކްނީ ޓްރީޓްމަންޓް ފުޅިތައް ރީޓެއިލް ފިހާރަތަކުން ނަގަން ވަނީ ފަށާފަ އެވެ.