ރާއްޖެ ޓީވީން ގެނެސްދިން ޕްރަގްރާމެއް ގައި ޑައުންސިންޑްރޯމް އަދި އޯޓިޒަމް ކުދިންގެ ޙާލަތާއި ގުޅުވައިގެން ސިޔާސީ މީހުންނާ ގުޅުވައި މިސާލު ޖަހާ ވާހަކަ ދެއްކި މައްސަލަ ހޫނުވެފައި ވަނިކޮށް ބަޔާނެއް ނެރެ މާފަށް އެދޭ ކަމަށް ބުނެފި އެވެ.

އެ ޓީވީން ގެނެސްދިން ކާލާ ބައިސާ ޕްރޮގްރާމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ނޫސްވެރިޔަކަށް ފޯނުން ގުޅުއްވާފައި އިންޒާރުދިން ވާހަކަ ދައްކަވައި ސަރުކާރަށް ފާޑުވިދާޅުވަމުން ޕާޕާ އެންމެ ފުރަތަމަ ވިދާޅުވީ، ރައީސް މުޢިއްޒު އެފަދައިން ކަން ކުރެއްވީ ގޮތް ހުސްވެގެން ކަމަށެވެ. އަދި ގޮތް ހުސްވުމުން މީހުން އަތުންފައިން ގޯސް ހަދާނެކަމަށް ވިދާޅުވެ، އެކަން ދެން ގުޅުވާލީ އޯޓިޒަމާއެވެ. 

"ގޮތް ހުސްވެ، ހަތަރު އުދަރެސް ފެނުޖެހުނީމާ އަތުންފައިން ގޯސް ހަދާނެ. އަސްލު މީނައަކީ (ރައީސް މުޢިއްޒަކީ) އޮޓިސްޓިކް ގޮތެއް ހުންނަ މީހެއްހެން ހީވަނީ އޮޕަރޭޓް ކުރާ ގޮތުން." ޕާޕާ ފަޔާޒު ވިދާޅުވިއެވެ.

އޭނާ މިހެން ވިދާޅުވުމުން މޮސްޓާ ވަނީ އެއަށް ބާރުދެއްވައި ޖޯކު ޖައްސަަވަމުން ރައީސްގެ "އޮޓިސްޓިކް އެކަންޏެއް ނޫން ޑައުންސިންޑްރޮމްވެސް ހުންނަހެން ހީވާ." ކަމަށް ވިދާޅުވެފައެވެ. 

އެއާއެކީ ޓީވީ ޕްރެޒެންޓަރު އަދި މި ދެބޭފުޅުން ވަނީ އެފަދަ ބަލިތައް ތަހައްމަލު ކުރަމުންދާ ކުދިންގެ ހާލަތަށް މަލާމާތްކޮށް ހީ ހަދާފައެވެ. 

އެއަށްފަހު އަނެއްކާވެސް ޕާޕާ ވަނީ، ރައީސް މުޢިއްޒު، ”އެއްކޮށް ހަމަ ނޫން“ ކަމަށާ "ކޮންމެވެސް ވަރަކަށް މައްސަލަ އުޅޭ“ ކަމަށާ، އެމަނިކުފާނަކީވެސް އެފަދަ ”ބަލިކުއްޖެއް“ ކަމަށް ވިދާޅުވެފައެވެ. 

"މިދަންނަވަނީ ކޮންމެއަކަސް މީނާއަކީ ބަލި ކުއްޖެކޭ، އެނގެންވާނެ ނޫސްވެރިއަކަށް ގުޅާއިރު މީނާ ދައްކާ ވާހަކަ ރެކޯޑު ވާނެކަން. ނޭނގެނީ އޭނާ ސިކުނޑީ މައްސަލައެއް އުޅެނީއެއްނު." ޕާޕާ ވިދާޅުވިއެވެ.

މި ވާހަކަތަކާއި ގުޅިގެން ގިނަ ބަޔަކު ދަނީ މީސްމީޑިޔާގައި ކަންބޮޑުވުން ފާޅުކޮށް މިއީ ސިޔާސީ ގޮތުން ހައްދު ފަހަނައަޅައި ދިޔުން ކަމަށް ވިދާޅުވެފައެވެ.

މި މައްސަލަ ހޫނުވެ އެ ވާހަކަ ދެއްކެވި ބޭފުޅުންނާއި ރާއްޖެޓީވީއަށް ފާޑުކިޔުން އަމާޒުވުމުން އެ ސްޓޭޝަނުން ނެރުނު ކުރު ބަޔާނެއްގައި ބުނެފައި ވަނީ އެ ވާހަކަތަކާމެދު ކަންބޮޑުވުން ފާޅުކުރަމުންދާތީ އެ ވާހަކަތަކުން އޯޓިޒަމް ކުދީންނަށް ނިކަމެތި ކަމެއް އަންނަ ކަމަށް އެއްވެސް ބަޔަކަށް ގަބޫލުކުރެވޭނަމަ އެކަމަށްޓަކާ ރާއްޖެޓީވީން މާފަށް އެދޭ ކަމަށެވެ.

މިއީ މިފަދަ ބޮޑު މައްސަލައެއްގައި މާފަށް އެދި ނެރުނު ބަޔާނެއްތޯ ބައެއް މީހުން ދަނީ ސުވާލު ކުރަމުންނެވެ. އަދި ރާއްޖެޓީވީއަށް ފާޑުކިޔުން ވަނީ އިތުރުވެފަ އެވެ.