އެމްޑީޕީގެ ރައީސް އަދި ކުރީގެ ފޮރިން މިނިސްޓަރ ޢަބްދުﷲ ޝާހިދު އިންޑިއާގެ ބޮޑުވަޒީރު، ނަރެންދުރަ މޯދީއާ ބައްދަލުކުރައްވައިފިއެވެ.
ޝާހިދު މޯދީއާ ބައްދަލުކުރައްވާފައިވަނީ، އިންޑިއާގެ ނިއުސް ނައިން އިން އިންތިޒާމުކޮށްގެން ބާއްވާ ގްލޯބަލް ސަމިޓް 2025 ގެ ހަވަސާގެ ތެރެއިންނެވެ. ދެ ބޭފުޅުންގެ ބައްދަލުވުމުގެ އިތުރު ތަފްސީލެއް އަދި ނުލިބެއެވެ.
ޝާހިދު ވަނީ ގްލޯބަލް ސަމިޓް 2025 ގެ، ދެ ހަރަކާތެއްގައި ވާހަކަފުޅު ދައްކަވާފައެވެ. ސަމިޓްގައި ޝާހިދު ދެއްކެވި ވާހަކަފުޅުގައި ދުނިޔޭގެ މަސްރަހުގައި ހިނގަމުން އަންނަ އެކިއެކި ކަންކަމަށް ކުރިމަތިލުމުގައި ގައުމުތަކަށް ދިމާވެފައިވާ ގޮންޖެހުންތަކާ ބެހޭ ގޮތުންނާއި، ދުނިޔޭގެ މަސްރަހުގައި ދެކުނު އޭޝިއާގެ ގައުމުތަކުގެ ދައުރާ ބެހޭ ގޮތުން ވާހަކަ ދެއްކެވިއެވެ. އަދި މީގެ އިތުރުން އިންޑިއާއިން މިހާރު ދުނިޔޭގައި އަދާކުރަމުންދާ ދައުރާއި، އެދައުރުގެ މުހިއްމުކަމާ މެދު ޝާހިދު ވާހަކަދެއްކެވިއެވެ.
މީގެ އިތުރުން ދުނިޔޭގެ ދެކުނު ބިތުގެ، ނުވަތަ ގްލޯބަލް ސައުތުގެ ބައިވެރިވުން އދފަދަ ޕްލެޓްފޯމްތަކުގައި އޮންނަ ގޮތާއި ބެހޭ ގޮތުންނާއި، ކުރިއަރަމުން އަންނަ ގައުމުތަކަށާއި، ގްލޯބަލް ސައުތަށް ލިބެން ޖެހޭ އިތުރު ބައިވެރިވުމުގެ މައްޗަށް ޝާހިދު އަލިއަޅުއްވާލެއްވިއެވެ.
ނިއުސް ނައިން ގްލޯބަލް ސަމިޓްގައި އިންޑިއާގެ ބޮޑުވަޒީރުގެ އިތުރުން އެގައުމުގެ ސަރުކާރާއި، އެކިއެކި ސިނާޢަތްތަކުގެ އިސްވެރިން ބައިވެރިވެވަޑައިގެންނެވިއެވެ.
Advertisement
This content is created and paid for by advertisers and does not involve Voice Journalists
