ފަގީރުންގެ ދަފްތަރުފައިވާ ކޮންމެ ފަރުދަކަށް ފިޠުރު ޒަކާތުގެ ގޮތުގައި 4500 ރުފިޔާ ޖަމާކޮށްފި އެވެ.

އެކަން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ޔަގީންކޮށް ދެއްވާފަ އެވެ. މިނިސްޓަރު ވިދާޅުވީ ފަގީރުންގެ ދަފްތަރުފައިވާ ކޮންމެ ފަރުދަކަށް ފިޠުރު ޒަކާތުގެ ގޮތުގައި 4500 ރުފިޔާ ޖަމާކޮށްފައިވާ ކަމަށެވެ.

އަދި ވިދާޅުވީ ގޮވާމުން މާލެ އޭރިއާގެ ކޮންމެ ފަގީރަކަށް 15 ކިލޯ ދިނުމަށް ވެސް ނިންމާފައިވާ ކަމަށެވެ.

Advertisement

މި އަހަރު ފިޠުރު ޒަކާތް ބަހާފައި މިވަނީ ފަޤީރުންގެ ދަފްތަރުގައި ހިމެނޭ ފަރާތްތަކަށް އެއް ހަމައަކުންނެވެ.

މިނިސްޓަރު ވިދާޅުވި ގޮތުގައި މީގެ ކުރިން މިކަން ކުރަމުން އައި ގޮތަކީ އެރަށަކުން ލިބޭ އެއްޗެެއް އެކަނި އެރަށަކަށް ބަހާ ގޮތަށް ކަމަށެވެ. މިހެން މިކަން ކުރީމަ ބައެއް ރަށް ރަށުގައި ފަޤީރުންނަށް ލިބެނީ ވަރަށް މަދު މިންވަރެއްކަން ވެސް މިނިސްޓަރު ފާހަގަ ކުރެއްވި އެވެ. އަދި ވިދާޅުވީ މިހާރު ތަފާތަކީ މުޅިރާއްޖެއަކީ އެއްބައެއް ކަމުގައި ބަލައި އެގޮތުން ބަހަން ފެށުން ކަމަަށެވެ.

މިއީ ރާއްޖޭގެ ފިޠުރު ޒަކާތުގެ ތާރީޚުގައި ފުރަތަމަ ފަހަރަށް ގެނެވުނު މިފަދަ ބަދަލެވެ.