މިއަހަރުގެ ޑިސެމްބަރުގެ ނިޔަލަށް އިންތިޚާބު ނުބާއްވައިފިނަމަ ރައްޔިތުންގެ ހިތުގައި ސަރުކާރާއި ދޭތެރޭ ނަފްރަތު އުފެދި، މަސްރަހު ގޯސްވެދާނެކަމުގެ އިންޒާރު އެގައުމުގެ މައި އިދިކޮޅު ޕާޓީއިން ދީފިއެވެ.

ބަންގްލަދޭޝް ނޭޝަނަލިސްޓް ޕާޓީއިން މިއިންޒާރު ދިނީ، ޑިސެމްބަރު މަހާއި އަންނަ އަހަރުގެ ޖޫން މަހާއި ދޭތެރޭ އިންތިޚާބު ބާއްވަން ޖެހިދާނެކަމަށް ބަންގްލަދޭޝްގެ ސަރުކާރު ހިންގުމާ ވަގުތީ ގޮތުން ހަވާލުވެގެން ހުންނެވި މުހައްމަދު ޔޫނުސް ވިދާޅުވުމާ ގުޅިގެންނެވެ. ޔޫނުސް ބަންގްލަދޭޝްގެ ސަރުކާރު ހިންގެވުމާއި ހަވާލުވެވަޑައިގެންނެވީ ނިމިދިޔަ އަހަރު ބަންގްލަދޭޝްގައި ހިނގި މުޒާހަރާތަކަށްފަހު ބޮޑުވަޒީރު ޝައިޚް ހަސީނާ ގައުމު ދޫކުރައްވައި، މަގާމުން އިސްތިއުފާ ދެއްވުމާއި ގުޅިގެންނެވެ. އިސްތިއުފާ ދެއްވުމަށްފަހު ޝައިޚް ހަސީނާ ވަޑައިގަތީ އެކަމަނާ ގާތްގުޅުމެއް ބާއްވަމުން ގެންދެވި އިންޑިއާއަށެވެ.

ނިމިދިޔަ އަހަރު އިންތިޚާބު ބާއްވަން ހަސީނާގެ އަވާމީ ލީގާއި، އިދިކޮޅު ބީ.އެން.ޕީ އިންވެސް ބޭނުންވިއެވެ. އެހެންނަމަވެސް މިއަހަރު އިންތިޚާބު ބޭއްވުމަށް ފަސްކުރީއެވެ. ބަންގްލަދޭޝްގެ ވަގުތީ ސަރުކާރުން މިހާރު ބުނަނީ މިނިވަން އިންސާފުވެރި އިންތިޚާބެއް ބޭއްވޭނެ މާހައުލެއް އަދި އެގައުމުގައި ނެތްކަމަށެވެ. ޔޫނުސް ވިދާޅުވީ އިތުބާރު ކުރެވޭ އިންތިޚާބެއް ބޭއްވުމަށް ވާން ޖެހޭ ތައްޔާރީތައް ނިމި، އިންތިޚާބެއް ބޭއްވޭނީ އަންނަ އަހަރު ކަމަށެވެ.

Advertisement

އަނެއްކޮޅުން އިދިކޮޅު ބީ.އެން.ޕީ އިން ބުނަނީ އެގައުމަށް ޑިމޮކްރަސީ އެނބުރި އަންނަން ޖެހޭކަމަށައި، މިއަހަރު އިންތިޚާބު ބާއްވަން ޖެހޭނެކަމަށެވެ. ވަގުތީ ސަރުކާރުވެސް، ކުރިން އެއްބަސްވިގޮތަށް ޑިސެމްބަރު މަހު އިންތިޚާބު ބޭއްވުމަށްފަހު ޝަރަފުވެރިކަމާއެކު ސަރުކާރު ދޫކޮށް ދިޔުމަކީ އެންމެ ރަނގަޅު ގޮތްކަމަށް ބީ.އެން.ޕީ އިން ދެކެއެވެ. ހަމަ އެއާއެކު އިންތިޚާބު ނުބާއްވައިފިނަމަ ރައްޔިތުންގެ ތެރޭގައި ނުތަނަވަސްކަން އުފެދި، އަނެއްކާވެސް ހަމަނުޖެހުމަކަށް ހިނގައިދާނެކަމަށް އެޕާޓީގެ އިސްއޮފިޝަލަކު އިންޒާރު ދެއްވިއެވެ