ހއ.ކެލާ އަދި ކ.ކާށިދޫ ފަޅުގައި ރިސޯޓު ތަރައްގީކޮށް ހިންގާނެ ބަޔަކު ހޯދުމަށް ޓޫރިޒަމް މިނިސްޓްރީން އިއުލާންކޮށްފި އެވެ.

މިނިސްޓްރީން ކުރި އިއުލާނުގައި ބުނީ، ކެލާ ފަޅުން ހިއްކަން ހަމަޖެހިފައިވާ 12.1 ހެކްޓަރުގެ ދެ ބިމުގައި، ރިޒޯޓެއް ތަރައްޤީކޮށް ހިންގާނެ ފަރާތްތައް ހޯދުމަށް ބީލަމަށް ހުޅުވާލާ ކަމަށެވެ. 

އަދި މިކަމަށް ޝައުގުވެރިވެލައްވާ ފަރާތްތަކުން 15 އެޕްރީލު 2025 ވާ އަންގާރަ ދުވަހުގެ 10:00 ގައި އަދި 06 މޭ 2025 ވާ އަންގާރަ ދުވަހުގެ 13:00 ގައި ވަރޗުއަލްކޮށް (ޒޫމް މެދުވެރިކޮށް) ބާއްވާ މަޢުލޫމާތު ސާފުކުރުމުގެ ބައްދަލުވުމުގައި ބައިވެރިވުމަށް އެދިފައިވެއެވެ.

މީގެ އިތުރުން، އެ މިނިސްޓްރީން ކުރި އިއުލާންގައި ބުނީ ކާށިދޫ ފަޅުން ހިއްކާ 10 ހެކްޓަރުގެ ބިމުގައި ރިސޯޓު ތަރައްގީކޮށް ހިންގުމަށް ޝައުގުވެރިވާ ފަރާތްތަކުންވެސް އެކަަމަށް އެދި ބިޑު ހުށަހެޅުމުގެ ފުރުސަތު ހުޅުވާލުމަށް ނިންމާފައިވާކަމަށެވެ. 

އަދި މިމަހުގެ 15 ވަނަ ދުވަހާއި އަންނަ މޭ މަހުގެ ހަވަނަ ދުވަހު ވާޗުއަލްކޮށް ބާއްވާ މަޢުލޫމާތު ސާފުކުރުމުގެ ބައްދަލުވުންތަކުގައި ބައިވެރިވުމުގެ ފުރުސަތު ވަނީ ހުޅުވާލައިފއިވާ ކަމަށާ ބީލަން ހުށަހެޅުމުގެ ސުންގަޑިއަކީ އަންނަ ޖޫން މަހުގެ ފަސްވަނަ ވަނަ ދުވަސް ކަމަށް އިއުލާނުގައިވެއެވެ. 

ކެލާ ފަޅުގައި ދެ ރިސޯޓު ތަރައްގީކުރުމަށް ނިންމާފައި ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފެބްރުއަރީ މަހު އެރަށަށް ކުރެއްވި ދަތުރުފުޅުގެ ތެރެއިންނެވެ.