ދުންފަތުގެ ވިޔަފާރިކުރާ ފަރާތްތަކުން އެވިޔަފާރިތައް ދޫކޮށްލުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގޮވާލައްވައިފިއެވެ.

ރައީސުލްޖުމްހޫރިއްޔާގެ އޮފީހުން އިންތިޒާމުކޮށްގެން ބާއްވަމުން އަންނަ "ރައްޔިތުންނާއެކު" ޕޮޑްކާސްޓްގެ ދެވަނަ އެޕިސޯޑް މިއަދު ވާހަކަފުޅު ދައްކަވަމުން ރައީސް ޑރ.މުއިއްޒު ވަނީ އަދުގެ ޖީލު ދުންފަތުން ދުރުކުރުމަށް ކުރައްވަމުންގެންދަވާ މަސައްކަތްތައް ވަރަށް ތަފްސީލީ ގޮތެއްގައި ވިދާޅުވެދެއްވާފައެވެ.

ޕޮޑްކާސްޓްގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ އަޅުގަނޑުމެންގެ ޒުވާން ޖީލު ދުންފަތާ ދުރުކުރުމަށް ފަށާފައިވާ މަސައްކަތްތަކަށް ރައްޔިތުންގެ ފަރާތުން ވަރަށް އެދެވޭގޮތެއްގައި ބަލައިގަނެފައިވާކަން ފާހަގަކުރެވޭ ކަމަށެވެ.

Advertisement

މިގޮތުން ދުންފަތް މަނާކުރުމަށް މިހާތަނަށް އެޅުނު ފިޔަވަޅުތަކުން ނުވެސް ދަންނަ މީހުންގެ ފަރާތުން އެކަން ބަލައިގަނެ ޝުއޫރުތައް ފާޅުކުރަމުންދާކަމަށް ރައީސް ޑޜ.މުއިއްޒު ވިދާޅުވިއެވެ. ދުންފަތުގެ އަވާގައި ޖެހިފައިތިބި ދުންފަތުގެ ވަބާ ތަހައްމަލުކުރަމުންގެންދާ އާއިލާތަކުގެ އުދާސްތައް ވަރަށް ރަނގަޅަށް އެނގިވަޑައިގަންނަވާކަން ފާހަގަކުރައްވަމުން ރައީސް ވިދާޅުވީ،  ފަހަރަކު ތަންކޮޅެއް ޓެކްސް ބޮޑުކޮށްގެނެއް މިކަމެއް ނުވާނޭ ކަމަށާއި، އެކަމުންވެސް އެދެވެނީ، ސިނގިރޭޓް އެތެރެކުރާ މީހުންނަށް ފުރުޞަތެއްކަމަށެވެ.

ރައީސް ވިދާޅުވީ ރާއްޖެއަކީ ކުޑަކުޑަ ޤައުމެއް ކަމަށާއި، މިއީ މިލިއަނުން މީހުން އުޅެމުންދާ ތަނެއްވެސް ނޫންކަމަށާއި، އެވަރަކުން މިތަނުގައި ސިނގިރޭޓް ވިޔަފާރި ކުރަންވީ ކީއްވެގެންތޯ ރައީސް ވަނީ ސުވާލު އުފައްދަވާފައެވެ.

ދުންފަތުގެ ވަބާއިން ދިވެހި މުޖުތަމައު ސަލާމަތްކުރުމަށް ފައްޓަވާފައިވާ މަސައްކަތްތަކާ ގުޅޭގޮތުން ރައީސް ޑރ.މުއިއްޒު ވިދާޅުވީ، މި މަސައްކަތް ފެށީ އިހްލާސްތެރިކަމާއެކު ކަމަށާއި، އަޅުގަނޑުމެންގެ ޅަދަރިން، ތުއްތުކުދިން، މި ނުރަނގަޅު އާދައިގެ ތެރެއަށް ދާން ދޫކޮށްލައިގެން ސަރުކާރެއް އޮންނަންވީ ސަބަބެއް ނުވިސްނޭ ކަމަށެވެ.

މިކަމުގައި ސަރުކާރުގެ ޒިންމާތަކެއް އޮތްކަން ފާހަގަ ކުރައްވަމުން ރައީސް ވިދާޅުވީ، މިކަމުގައި ސަރުކާރުން އަދާކުރަންޖެހޭ ޒިންމާ އަދާނުކޮށްފިނަމަ، ދެން ފެނިގެންދާނީ އެހެން ޤައުމުތަކުގައިވެސް ކަންކަން ވަމުންދާ ބީދައިން، ޒުވާން ކުދިން ސިނގިރޭޓުގެ ތެރެއަށް ގޮސް، ނޫނީ ދުންފަތުގެ އިސްތިޢުމާލުގެ ތެރެއަށް ގޮސް، އެއިން ސަލާމަތް ނުވެގެން އުޅެންޖެހޭ މަންޒަރުކަމަށެވެ.