ދުނިޔޭގެ އެންމެ އަޑުގަދަ ކަމަށް މޮޅެތި ކޯޗުން ފާހަގަކުރާ އިނގިރޭސިވިލާތުގެ މަޝްހޫރު ލިވަޕޫލްގެ ސްޓޭޑިއަމްގައި ދިވެހިރާއްޖެ އިސްތިހާރުކުރުމުގެ މަސައްކަތް ފަށައިފިއެވެ.

މަންޒިލެއްގެ ގޮތުގައި ރާއްޖޭގެ ފަތުރުވެރިކަން އިސްތިހާރުކުރުމަށް ލިވަޕޫލް ފުޓްބޯލް ކްލަބް (އެލްއެފްސީ) އާއެކު ހައި އިމްޕެކްޓް ސްޓްރެޓެޖިކް ޕާޓްނާޝިޕެއް ގާއިމުކޮށް، ދުނިޔޭގެ ފެންވަރުގައި ފާހަގަކޮށްލެވޭ މި ފުޓްބޯޅަ ކްލަބުގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރަކަށް ދިވެހިރާއްޖެ ހަމަޖައްސިކަން އިއުލާނުކުރީ މިދިޔަ މާޗްމަހުގެ 13 ވަނަ ދުވަހުއެވެ. މި އެއްބަސްވުމުގެ ދަށުން ލިވަޕޫލްގެ ދަނޑުގައި ރަސްމީކޮށް ރާއްޖެ އިސްތިހާރުކުރުމުގެ މަސައްކަތް ފަށާފައިވަނީ، ލިވަޕޫލާއި އެވަޓަންއާ ބައްދަލުކުރި މެޗުންނެވެ.

ލިވަޕޫލްގެ ދަނޑުގައި ރާއްޖެ އިސްތިހާރުކުރުމުގެ މަސައްކަތް ފެށުމުގެ ރަސްމިއްޔާތަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާއި އެމްއެމްޕީއާރުސީގެ  އިތުރުން ކުޅިވަރާ ބެހޭ ވުޒާރާގެ އެންމެ އިސްވެރިން ބައިވެރިވެ ވަޑައިގެންނެވިއެވެ.

Advertisement

މި އެއްބަސްވުމުގެ ދަށުން ލިވަޕޫލްގެ އެންފީލްޑް ދަނޑުގެ ޕިޗް ވަށައިގެން ޖަހާފައިހުރި ލެޑް އިސްތިހާރު ބޯޑުތަކުގައި ވިސިޓް މޯލްޑިވްސްގެ އިސްތިހާރުތައް ދައްކާނެއެވެ. މީގެ އިތުރުންވެސް ލިވަޕޫލްގެ އިތުރު ޕްލެޓްފޯމްތަކުގައި ރާއްޖެ އިސްތިހާރުކުރުމަށް ވަނީ ހަމަޖެހިފައެވެ.

ރައީސް ޑރ. މުއިއްޒު އާއި ބައެއް ވަޒީރުން އެންފީލްޑްގައި... ފޮޓޯ: ރައީސް އޮފީސް

އިނގިރޭސި ޕްރިމިއާ ލީގްގެ އިތުރުން ލިވަޕޫލަކީ މުޅި ދުނިޔެއަށް ބަލާއިރުވެސް އެންމެ ސަޕޯޓަރުން ގިނަ އެއް ޓީމެވެ. ދުނިޔޭގެ އެކި ކަންކޮޅުތަކުގައިވާ ލިވަޕޫލްގެ ސަޕޯޓަރުންގެ އަދަދު 500 މިލިއަނަށް އަރައެވެ. ލިވަޕޫލްގެ ސްޓޭޑިއަމް އެންފީލްޑަށް ބަލާއިރު، ފުޓްބޯޅައިގެ އެންމެ ކާމިޔާބު އަދި ފުންނާބު އުސް ކޯޗުންކަމަށްވާ ގާޑިއޯލާ، އާސެން ވެންގާ އަދި ސަރ އެލެކްސް ފާގަސަން ފާހަގަކުރާ ގޮތުގައި އެންފީލްޑަކީ ސަޕޯޓަރުންގެ އަގު އެންމެ އަޑުގަދަ އެއް ސްޓޭޑިއަމެވެ. އެއީ އެހެންޓީމްތަކަށް ލިވަޕޫލް ބަލިކުރަން އެންމެ އުނދަގޫވާ އެއް ސަބަބުކަމަށް ކޯޗުން ބުނެއެވެ.

މިކަމާ ގުޅޭގޮތުން އެމްއެމްޕީއާރުސީން ބުނެފައިވަނީ، މި ޕާޓްނާޝިޕްގެ ޒަރިއްޔާއިން ވިޒިޓް މޯލްޑިވްސްއަށް އެލްއެފްސީގެ ބައިނަލްއަގްވާމީ އޯޑިއަންސުން ބޮޑު ތަރުހީބެއް ލިބިގެންދާނެ ކަމަށެވެ. އަދި ކްލަބުގެ މަގުބޫލުކަމުގެ ބޭނުންހިފައި، މި ވަރުގަދަ އޯޑިއަންސްގެ ގިނަ ބަޔަކު ރާއްޖެއަށް ދަތުރުކުރުމަށް ބާރުއަޅާނެ އެވެ. މި އެއްބަސްވުމުގެ ސަބަބުން 2025 ވަނަ އަހަރު ރާއްޖެއަށް އިތުރު އެއް ލައްކައަށްވުރެ ގިނަ ފަތުރުވެރިން އަންނާނެ ކަމަށް ލަފާކޮށްފައިވާއިރު، ފަތުރުވެރިކަމުގެ އާމްދަނީގެ ގޮތުގައި 100 މިލިއަނަށްވުރެ ގިނަ ޑޮލަރު ލިބޭނެ ކަމަށް ލަފާކޮށްފައިވެއެވެ.