ލާމު އަތޮޅުގެ ރަށްތަކާއި މާލެއާ ދެމެދު ދަތުރުކުރާ "ހޮޅުދޫ ބޯޓް" ގައި ރޭ ހިނގި ނުރައްކާތެެރި އަލިފާނުގެ ހާދިސާ ގައި ގެއްލުނު ލ. މާވަށު އަހިމާގެ, އުމުރުން 25 އަހަރުގެ އަލީ މުޝްފިޤް މުހައްމަދު ޝަރީފް ހޯދުމަށް ބޮޑު ސަރަހައްދެއް ބަލާފައިވާ ކަމަށް އެމްއެންޑީއެފުން ބުނެފި އެވެ.

ރޭގެ ހާދިސާ ހިނގިއިރު ބޯޓްގައި 18 މީހަކު ތިއްބެވެ. އެއީ ކެޕްޓަނާއި ފަޅުވެރީންނާއި ބޯޓުން ދަތުރުކުރި ބައެއް ފަސިންޖަރުންނެވެ. ބޯޓުން ދަތުރުކުރި 17 މީހަކު ވަނީ ސަލާމަތް ކޮށްފަ އެވެ.

މުޝްފިޤު ހޯދުމަށް ރޭ ވަނީ ބޮޑު އޮޕަރޭޝަނެއް ފަށާފަ އެވެ.

Advertisement

އެމްއެންޑީއެފުން ބުނީ ސާފޭސް ސަޗްގެ ގޮތުގައި 53.04 ސްކުއެއާ ނޯޓިކަލް މޭލް ވަނީ ބަލާފަ އެވެ. އަދި އަންޑާވޯޓާ (ޑައިވިން) ސާޗްގެ ގޮތުގައި 64240 އަކަމީޓަރު ވަނީ ބަލާފަ އެވެ.

މީގެ އިތުރުން ވައިގެ މަގުން 1545 ސްކުއެއާ މޭލް (4000 އަކަމީޓަރު) ވަނީ ބަލާފަ އެވެ.

މުޝްފިޤް ހޯދުމުގެ މަސައްކަތުގައި ކަނޑާއި ވައިގެމަގުން އަދި ޑައިވަރުން ވެސް ދަނީ ހަރަކާތްތެރިވަމުން ކަމަށް އެމްއެންޑީއެފުން ބުންޏެވެ.