ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ވާދަކުރުމުގެ ޝައުގުވެރިކަން ކުރީގެ ޓްރާަސްޕޯޓް މިނިސްޓަރު ޑރ. އަހްމަދު ޝަމްހީދު ފާޅު ކުރައްވައިފި އެވެ.

އެކަމުގެ ޝައުގުވެރިކަމާއި އެކަމާއި ގުޅޭ މަޝްވަރާތައް ފެށުމަށް ގަސްތު ކުރައްވާ ކަމަށް ޝަމްހީދު ވަނީ ޔަގީން ކޮށް ދެއްވާފަ އެވެ.

ހުޅުމާލެ ދެކުނު ދާއިރާގެ މެމްބަރު ކަން ވެސް ކުރައްވާ ޝަމްހީދު ވަނީ އެ މަސައްކަތުގައި އެހީތެރި ކަމަށް އެދި ޕާޓީގެ ބައެއް މެންބަރުންނަށް މެސެޖެއް ވެސް ކުރައްވާފަ އެވެ.

Advertisement

ދެން އޮންނަ ރިޔާސީ އިންތިހާބުގައި ވާދަކުރަން އެމްޑީޕީގެ ޓިކެޓް ހޯދުމަށް ރިޔާަސީ ރޭހަށް ޝަމްހީދު ނިކުންނަވާނެ ކަމުގެ އަޑުތައް އޮތްތާ ދުވަސްތަކެއް ވެއްޖެ އެވެ.

މި ދުވަސްވަރަކީ އެމްޑީޕީގެ ރިޔާސީ ޕްރައިމަރީގެ ވާހަކަ ވަރަށް ބޮޑަށް ދެކެވޭ ދުވަސްވަރެކެވެ. 

ދެން އަންނަ ރިޔާސީ އިންތިހާބުގައި އެމްޑީޕީގެ ޓިކެޓް ރަައީސް ސޯލިހަށް ހޯދާ ދިނުމަށް އެ ޕާޓީގެ މެންބަރުން ކެމްޕެއިނެއް ވަނީ ފަށާފަ އެވެ. އެމްޑީޕީގެ ރިޔާސީ ޕްރައިމަރީގައި ރައީސް ސޯލިހް ވާދަކުރައްވަން ނިންމެވި ކަމަށް ވެސް އަޑުތައް ގަދަވެފައިވެ އެވެ.

ޝަމްހީދު ވަނީ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައި ޓްރާަސްޕޯޓް މިނިސްޓަރު ކަން ކުރައްވާފަ އެވެ. އޭނާ އެ މަގާމަށް ވަޑައިގެންނެވީ ޖުމްހޫރީ ޕާޓީގެ ސްލޮޓެއްގަ އެވެ. އެމްޑީޕީއާ ގުޅިވަޑައިގަތުމުގެ ކުރީން ޝަމްހީދަކީ ޖުމްހޫރީ ޕާޓީގެ މެންބަރެކެވެ.