ބްރޯޑްކާސްޓިން ކޮމިޝަނުގެ ހުސްވެފައިވާ މެމްބަރުކަމުގެ މަޤާމަށް ކުރިމަތިލުމުގެ ފުރުސަތު ހުޅުވާލައިފިއެވެ.
ރައީސުލްޖުމްހޫރިއްޔާގެ އޮފީހުން މިއަދު ގެޒެޓްކުރި އިއުލާނުގައި ބުނެފައިވަނީ، ކޮމިޝަނުގެ ހުސްވެފައިވާ މެމްބަރުކަމަށް ކުރިމަތިލުމުގެ ފުރުސަތު މިއަދުން ފެށިގެން ހުޅުވާލާފައިވާކަމަށެވެ. މެމްބަރުކަމަށް ކުރިމަތިލުމުގެ ފުރުސަތު ހުޅުވާލާފައިވަނީ މިހިނގާ އެޕްރީލްމަހުގެ 15 ވާ އަންގާރަ ދުވަހުގެ 12:00 ގެ ނިޔަލަށެވެ.
ކޮމިޝަނުގެ މެމްބަރަކަށް ވުމުގެ ޝަރުތުތަކުގެ ތެރޭގައި، މުސްލިމަކު ކަމުގައި ވުމާއި، ދިވެއްސަކު ކަމުގައި ވުމުގެ އިތުރުން އުމުރުން 18 އަހަރު ފުރިފައިވުން ހިމެނެއެވެ. މީގެ އިތުރުން ކޮމިއުނިކޭޝަނާއި ބްރޯޑްކާސްޓްކުރުމުގެ ދާއިރާގައި މާލީ މަޞްލަޙަތެއް އޮތް މީހަކު ކަމުގައި ނުވުމާއި، ސަރުކާރު ހިއްސާވާ ކުންފުންޏެއްގައި ވަޒީފާއަދާކުރާ މީހެއްކަމުގައި ނުވުންވެސް ހިމެނެއެވެ.
ބްރޯޑްކޮމްގެ މެމްބަރުކަމަށް ކުރިމަތިލުމުގެ ފުރުސަތު ހުޅުވާލާފައިވަނީ، ކޮމިޝަނުގެ ނައިބު ރައީސްކަމުގައި ހުންނެވި, މުޙައްމަދު ފަޒީން ވަކުކުރުމުންނެވެ. ފަޒީން ވަކިކޮށްފައިވަނީ އެތަނުގެ މުއައްޒަފަކަށް ޖިންސީ ފުރައްސާރަ ކުރިކަމުގެ ތުހުމަތުގައެވެ.
ބްރޯޑްކާސްޓިން ކޮމިޝަނަކީ ޓީވީ އާއި ރޭޑިއޯގެ ރެގިއުލޭޓްކޮށް ބަލަހައްޓާ ފަރާތެވެ.
Advertisement
This content is created and paid for by advertisers and does not involve Voice Journalists
