ނަފްސާނީ ދުޅަހެޔޮކަމާއި ހަށިހެޔޮކަމަށް ގެއްލުންވާ ކޮންމެ ކަމަކުން ދުރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ.

ރައީސުލްޖުމްހޫރިއްޔާ މިފަދައިން އެދުވަޑައިގެންފައިވަނީ ދުނިޔޭގެ ޞިއްހަތު ދުވަހާއި ގުޅިގެން މިއަދު މީސްމީޑިޔާގައި ކުރެއްވި ޕޯސްޓެއްގައެވެ.

އެގޮތުން އެމަނުކުފާނު ވިދާޅުވީ ދުނިޔޭގެ ޞިއްހަތު ދުވަސް ފާހަގަކުރާއިރު، ދިވެހި ކޮންމެ ރައްޔިތަކަށްވެސް ފުރިހަމަ ޞިއްހީ ފަރުވާ ލިބޭނެ މަގު ފަހިކުރުމަށްޓަކައި، ރާއްޖޭގެ ޞިއްޙީ ނިޒާމު ހަރުދަނާކުރުމުގެ މަސައްކަތް ކެނޑިނޭޅި ސަރުކާރުން ކުރަމުން އަންނާނެ ކަމަށެވެ.

އަދި ކަމާ ބެހޭ ފަރާތްތަކާ ގުޅިގެން ކޮންމެ ރައްޔިތަކަށްވެސް ފާގަތި މުސްތަޤުބަލެއް ހޯދައިދިނުމަށްކުރާ މަސައްކަތުގައި މި ސަރުކާރު ދެމިއޮންނާނެކަމަށެވެ.

ނަފްސާނީ ދުޅަހެޔޮކަމާއި ހަށިހެޔޮކަމަށް ގެއްލުންވާ ކޮންމެ ކަމަކުން ދުރުވުމަށް ރައީސުލްޖުމްހޫރިއްޔާ އެދިވަޑައިގެންފައިވާއިރު، ބަލިޖެހުމުގެ ކުރިން އަޅަންޖެހޭ ފިޔަވަޅުތައް އެޅުމަށް "އިންވެސްޓްކުރަން" ނުވަތަ އެކަމަށް ވަރަށް ބޮޑަށް ސަމާލުކަން ދޭން ޖެހޭކަމަށާއި، އެފަދަ ފިޔަވަޅުތައް އެޅުމަށް މަގުފަހިކުރުމަށް މި ސަރުކާރުން ޚާއްޞަ އިސްކަމެއް ދެއްވާކަމުގައި އެމަނިކުފާނުވަނީ ދާދިފަހުން ވިދާޅުވެފައެވެ.

އެގޮތުން، ވޭޕް މަނާ ކުރައްވާފައިވާއިރު، ދުންފަތުގެ އިސްތިއުމާލުކުރުމުން ޖީލެއް ދުރުކުރެވުމަށް، ޖެނެރޭޝަނަލް ބޭން އެއް ގެންނަވަން ދާދިފަހުން ވަނީ ރައްޔިތުންގެ ޚިޔާލަށް ހުޅުވާލާފައެވެ. 

އެ ގޮތުން އެ މަނިކުފާނު ހުށައަޅުއްވާ ގޮތްތަކަކީ

- 2007 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

- 2004 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

- 2000 ވަނަ އަހަރުގެ ޖެނުއަރީ 1އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން