މައިންނާއި ތުއްތު ކުދިންނަށް ލިބޭ ފަރުވާއާއި ޚިދުމަތްތަކުގެ ރެކޯޑްތައް ހަރުދަނާކަމާއެކު ބަލަހައްޓައި، އެމަޢުލޫމާތު ފަސޭހަކަމާއެކު ދުވަހުންދުވަހަށް އަދާހަމަކުރުމަށްޓަކައި ޑިޖިޓަލް ޕްލެޓްފޯމުތަކުގައި ބެލެހެއްޓުމުގެ މަސައްކަތް ސަރުކާރުން ފަށާފައިވާ ކަމަށް ސިއްޙަތާ ބެހޭ ވަޒީރު އަބްދުالله ނާޡިމް ވިދާޅުވެއްޖެއެވެ.

ވަޒީރު މިހެން ވިދާޅުވީ، މިއަދު ފާހަގަކުރަމުންދާ ބައިނަލްއަޤުވާމީ ސިއްޙަތުގެ ދުވަހުގެ މުނާސަބަތުގައި ދެއްވި ޚިޠާބުގައެވެ.

އެގޮތުން ވަޒީރު ވިދާޅުވީ، ކުޑަކުދިންގެ ނިޔުޓްރިޝަން ޙާލަތު މިހާރަށްވުރެވެސް ރަނގަޅު ކުރުމަށް ސިއްޙީ ޚިދުމަތްތެރިންނާއި ކުދިންގެ މައިންބަފައިން އަހުލުވެރި ކުރުވުމަށް ސަރުކާރުން މުހިންމު މަސައްކަތްތަކެއް ކުރަމުންދާ ކަމަށެވެ. 

Advertisement

އެގޮތުން ދުޅަހެޔޮ ސިއްޙަތަކަށް މަސައްކަތް ކޮށްދިނުމުގެ ގޮތުން، ޙަޔާތުގެ ފުރަތަމަ 1000 ދުވަހަށް އަމާޒުކޮށްގެން ތަންފީޒުކުރަމުންދާ ”ސޯޝަލް ބިހޭވިޔަރ ޗޭންޖު ކޮމިޔުނިކޭޝަން ސްޓްރެޓެޖީ ވަޒީރު ވަނީ ފާހަގަކުރައްވާފައެވެ. 

މި ސްޓްރެޓެޖީގެ ދަށުން އާއްމު ކުރެވިފައިވާ ތުއްތު ދަރިފުޅުގެ މިންހެޔޮ ކާނާ އާއި ރެސިޕީތަކުގެ މައުލޫމާތު ބޭނުން ކުރުމަށާ، ޅަފަތުގައި ދިނުމަށް ތާވަލް ކުރެވިފައިވާ ވެކްސިންތައް ޤަވާޢިދުން ދިނުމަށް ވަޒީރު ވަނީ އިލްތިމާސް ކުރައްވާފައެވެ.

މީގެ އިތުރުން މާބަނޑު ދުވަސްވަރު ދެވޭ ޚިދުމަތްތަކަށް ޚާއްސަކޮށް ފަރުމާ ކުރެވިފައިވާ މެޓާނަލް ހެލްތު މޮޑިޔުލް މުރާޖަޢާކުރުމުގެ މަސައްކަތްތައް މިހާރު ލުރެވެމުންދާކަންވެސް ވަޒީރު ފާހަގަކުރެއްވިއެވެ. 

ވަޒީރު ވިދާޅުވީ، މި ސަރުކާރުގެ އަމާޒަކީ، މުސްތަގުބަލުގައި މައިންނާއި ތުއްތު ކުދިންނަށް ލިބޭ ފަރުވާއާއި، ޚިދުމަތްތަކުގެ ރިކޯޑްތަކާއި، ސިއްހީ މައުލޫމާތުތައް ޚިދުމަތް ހޯދާ އާއްމު ފަރާތްތަކަށްވެސް، މޯލްޑިވްސް އިންޓަގްރޭޓެޑް ހެލްތު އިންފޮމޭޝަން ސިސްޓަމް މެދުވެރިކޮށް ބެލޭނެ އިންތިޒާމް ހަމަޖެއްސުން ކަމަށެވެ. 

އެއީ ރައްކާތެރި މައިވަންތަކަމާއި، ތުއްތު ދަރިފުޅުގެ ދުޅަހެޔޮ ސިއްޙަތަކަށް ވާސިލްވުމަށް މައިންބަފައިން ބާރުވެރިކޮށް، އެމީހުންގެ ދައުރު ހަރުދަނާ ކުރުމަށް އެޅޭ މުހިންމު ފިޔަވަޅަކަށް އެކަން ވެގެންދާނެކަންވެސް ވަޒީރު ފާހަގަކުރެއްވިއެވެ.