ދަ ޑިމޮކްރެޓްސްއިން ތެރެއިން ސަރުކާރެއް އުފައްދައި ރައްޔިތުންނަށް ހިދުމަތް ކުރުމުގެ ފުރުސަތެއް ނެތް ކަަމަށް ވިދާޅުވާ ވިދާޅުވުން އެ ޕާޓީގެ ކުރީގެ ރައީސް ހަސަން ލަަތީފް އަނެއްކާ ވެސް ތަކުރާރު ކުރައްވައިފި އެވެ.

ހަސަން މި ވާހަކަ ތަކުރާރު ކުރެއްވީ ކުރީގެ ވާހަކަތައް ހިއްސާކުރައްވާ އެކްސް ގައި ކުރެއްވި ޕޯސްޓެއްގަ އެވެ.

ޑިމޮކްރެޓްސްއިން ތެރެއިން ސަރުކާރެއް އުފައްދައި ރައްޔިތުންނަށް ހިދުމަތް ކުރުމުގެ ފުރުސަތެއް ނެތް ކަަމަށް މީގެ ތިން މަސް ކުރީން އޭނާ ވިދާޅުވި ވިދާޅުވުން ތަކުރާރު ކުރައްވާ ހަސަން ވިދާޅުވީ ޑިމޮކްރެޓްސްގެ ބައެއް ބޭފުޅުން ކުޑަކޮށް ހިތްޕުޅުހަމަޖެހިވަޑައި ނުގެންނެވި ނަމަވެސް، އަނެއްކާވެސް ދަންނަވަން އޮތީ އެ ވާހަކަ ކަމަށެވެ.

ހަސަން މި ވާހަކަ ތަކުރާރު ކުރައްވާފައި މިވަނީ އެމްޑީޕީއާ ރާއްޖެއަށް ވެސް އެންމެ ރަނގަޅު ގޮތަކީ ޑިމޮކްރެޓްސްއާ އެމްޑީޕީ ގުޅުން ކަމަށް ޑިމޮކްރެޓްސްގެ ބާނީ, ރައީސް މުހައްމަދު ނަޝީދު ވިދާޅުވެފައިވަނިކޮށެވެ. އަދި އެމަނިކުފާނުގެ ވާހަކަފުޅަށް ޑިމޮކްރެޓްސްގެ އިސްވެރީން ތާއީދު ކުރައްވާފައި ވަނިކޮށެވެ.

އެމްޑީޕީގެ ބައެއް އިސްވެެރީން ވެސް ވަަނީ އެ ވާހަކަފުޅަށް ތާއީދު ކުރައްވާފަ އެވެ. ނަމަވެސް ރައީސް ނަޝީދާއި ޑިމޮކްރެޓްސްގެ އިސްވެރީންނަށް މަރުހަބާ ކިޔަން ބައެއް ބޭފުޅުން ތާއީދެއް ނުކުރައްވަ އެވެ. އަދި ވިދާޅުވީ ޑިމޮކްރެޓްސް އަކީ އެމްޑީޕީއަށް މަޖިލީހުގެ ސުޕަ މެޖޯރިޓީ ގެއްލުވާލާ ރައީސް ސޯލިހަށް ދެވަނަ ދައުރެއް ލިބުމަށް ހުރަސް އެޅި ޕާޓީއެއް ކަަމަށެވެ.