ރާއްޖޭގައި ކައްކާ ލޮނު އުފައްދާ ފެކްޓްރީއެއް ހުޅުވާ ލޮނު އުފެއްދުމުގެ މަސައްކަތް ފަށާ ތާރީހުން ޖާގަ ހޯދައިފި އެވެ.

ލޮނު އުފައްދާ ފެކްޓްރީ ހުޅުވީ ތިލަދުންމަތީ އުތުރުބުރީ ދިއްދޫގަ އެވެ. މި މަސައްކަތް ކުރަނީ އެމްޑީޕް އިންވެސްޓްމަންޓް ނަމަކަށް ކިޔާ ކުންފުންޏަކުންނެވެ.

މިއީ ޖަޕާނުގެ ކުންފުންޏަކާ ދިވެހި ކުންފުންޏެއް ގުޅިގެން އުފައްދާފައިވާ ކުންފުންޏެކެވެ. 

Advertisement

އެ ކުންފުނިން ބުނި ގޮތުގައި ލޮނު އުފެއްދުމުގެ މަސައްކަތް ފެށީ އެކަމާއި ގުޅޭ ހާއްސަ ދިރާސާތަކަކަށް ފަހު އެވެ. އެ ދިރާސާތައް ޖަޕާނުގައި ވަނީ ކުރިއަށް ގެންގޮސްފަ އެވެ.

އެމްޑީޕް އިންވެސްޓްމަންޓުން ބުނި ގޮތުގައި ރާއްޖޭގެ ކަނޑުތަކުގައިވާ ލޮނު ފެނަކީ ކޮލެޓީ ފެނެކެވެ. އަދި ސިއްހަތަށް ފައިދާ ހުރި މާއްދާތަކުގެ މިންވަރު ވެސް ރާއްޖެ ސަރަހައްދުގައިވާ ކަނޑުގެ ލޮނުގައި މައްޗެވެ.

ބޭރު ގައުމެއްގައި ލޮނު އުފެއްދުމުގެ މަސައްކަތް ކުރަނީ

އެ ކުންފުނިން, ކައްކާ ލޮނުގެ އިތުރުން އެހެން ބައެއް ބާވަތްތަކުގެ ލޮނު ވެސް އުފައްދާނެ ކަމަށް ވަނީ ބުނެފަ އެވެ. އަދި ފެކްޓްރީގެ މަސައްކަތް ފުޅާކޮށް ރަށްތަކާއި ރިސޯޓްތަކަށް ވެސް ފޯރުކޮށްދޭނެ ކަމަށް ވަނީ ބުނެފަ އެވެ.

މި މަސައްކަތް ފެށުމާއި ގުޅިގެން މިނިސްޓަރު މުހައްމަދު ސައީދު ވަނީ މަރުހަބާ ވިދާޅުވެފަ އެވެ. އަދި އެ ފަދަ މަސައްކަތްތަކަށް ދައުލަތުން އެހީތެރިވެދޭނެ ކަމުގެ ޔަގީންކަން ދެއްވި އެވެ.

ރާއްޖޭގައި މި ފަސް އަހަރުތެރޭ ލޮނު އުފައްދަން ފަށާނެ ކަމަށް މިނިސްޓަރު ސައީދު ކުރީން ވެސް ވަނީ ވިދާޅުވެފަ އެވެ. މިއީ ކުރީގެ ސަރުކާރުތަކުން ވެސް ދައްކާފައިވާ ވާހަކަ އެކެވެ.