މަސައްކަތުގެ މައިދާނަށް ދިވެހިން ތަމްރީނުކުރުމަށް އެމްޓީސީސީން ކުރިއަށްގެންދާ ހުނަވަރު ޕްރޮގާރާމުގައި ބައިވެރިވުމުގެ ފުރުސަތު އެކުންފުނިން ހުޅުވާލައިފިއެވެ.

އެމްޓީސީސީން މިއަދު އާއްމުކުރި އިއުލާނެއްގައި ބުނެފައިވަނީ ހުނަވަރު ޕްރޮގްރާމުގެ ދަށުން ކޮންސްޓްރަކްޝަން އެންޑް ޑްރެޖިން ޑިވިޜަނުގައި މަސައްކަތްކުރުމަށް ޝައުގުވެރިވާ ފަރާތްތަކުން އެކަމަށް އެދި ކުރިމަތިލުމުގެ ފުރުސަތު މިހާރު ހުޅުވާލާފައިވާކަމަށެވެ. އެމްޓީސީސީން ނިންމާފައިވަނީ މިފަހަރުގެ ޕްރޮގްރާމުގައި  ބައިވެރިންނަށް ފުރުސަތުދޭށެވެ. ޖުމްލަ 3 މަހުގެ މުއްދަތަކަށް ކުރިއަށްގެންދާ މި ޕްރޮގްރާމުގަިއ މަސައްކަތްކުރަންޖެހޭނީ ހަފްތާއަކު 6 ދުވަހު – ދުވާލަކު 08 ގަޑި އިރުއެވެ. އެލަވަންސްގެ ގޮތުގައި ކަނޑައަޅާފައިވަނީ 5،000 ރުފިޔާއެވެ.

ޕްރޮގްރާމުގެ ޝަރުތަކަށް ސައިންސް ސްޓްރީމުން އޯލެވެލް ފުރިހަމަ ކޮށްފައިވާންޖެހޭއިރު، މަސައްކަތަށް ޝައުގުވެރިކަން ހުރުމާއި، ދާއިރާގެ އައު ހުނަރު ދަސްކުރުމަށް ޝައުގުވެރިކަން ހުންނަންޖެހެއެވެ.އެމްޓީސީސީން ބުނީ މިކަމަށް ޝައުގުވެރިވާ ފަރާތްތަކުން މިހިނގާ އެޕްރީލްމަހުގެ 10 ވަނަ ދުވަހުގެ 23:59 ގެ ކުރިން އެޕްލިކޭޝަން ހުށަހަޅަންޖެހޭނޭ ކަމަށެވެ. 

Advertisement

އެމްޓީސީސީގެ ހުނަވަރު ޕްރޮގްރާމް ފަރުމާކޮށްފައިވަނީ 3 މަސް ދުވަހުގެ ތަމްރީން ފުރިހަމަކުރުމަށްފަހު، އެ ތަމްރީން ޕްރޮގްރާމް ކާމިޔާބުކުރާ ފަރާތްތަކަށް ވަޒީފާގެ ފުރުސަތު ކަށަވަރުވާ ގޮތަށެވެ. އެމްޓީސީސީގެ އެކި ޑިޕާޓްމަންޓްތަކުގައި މިހާރުވެސް ހުނަވަރު ޕްރޮގްރާމުން ތަމްރީނުވެފައި ތިބި މީހުން ތިބިކަން ފާހަގަކޮށްލެވެއެވެ.

އެމްޓީސީސީއަކީ ސަރުކާރުގެ ކުންފުނިތަކުގެ ތެރެއިން ރައްޔިތުންނާ އެންމެ ގާތުން ހިދުމަތްދޭ އެއް ކުންފުންޏެވެ. ދިވެހި ރައްޔިތުންނަށް އެންމެ ފުރަތަމަ ހިއްސާ ވިއްކަން ފެށި ކުންފުންޏަކީވެސް އެމްޓީސީސީއެވެ.