މާލޭގެ ގެއެއްގެ ވެރިމީހާއަށް ބިރުދައްކައި، އަނިޔާކުރި މައްސަލައިގައި ހައްޔަރު ކުރި ހަތަރު މީހުން ޝަރުތުތަކަކާއެކު ކޯޓުން ދޫކޮށްލައިފި އެވެ.

ނިމިދިޔަ ރަމަޟާން މަހުގެ ތެރޭގައިފެންމަތިވި މި މައްސަލައާއި ގުޅިގެން ހައްޔަރު ކޮށްފައިވަނީ؛

- އަލީ ނަވާފު (21 އަހަރު) - ފަޒާ، ތ. ގުރައިދޫ

- މުހައްމަދު އަޒާން (23 އަހަރު) - ހަވޭލީ، ނ. މަނަދޫ

- އިބްރާހިމް އަހްނަފް (21 އަހަރު) - އެލަސް، ނ. ވެލިދޫ

- މުހައްމަދު އަފްލާހު (23 އަހަރު) - ރީތިހިޔާ، އއ. މާޅޮސް

އެ ހަތަރު މީހުން، ގޭގެ ވެރިފަރާތަށް އަނިޔާކުރާ މަންޒަރުގެ ވީޑިއޯ މީސް މީޑިއާގައި އާއްމުވެފައިވާއިރު، ވީޑިއޯއިން ފެންނަ ގޮތުން، ގޭގެ ވެރިމީހާގެ އަނގައިގައި ޓޭޕު އަޅައި ބަންދުކޮށް، އެކަކު ހިފަހައްޓައިގެން ހުންނައިރު އިތުރު މީހަކު ރޯކޮށްފައި އޮތް ސިނގިރޭޓެއް އެ މީހާގެ ގައިގައި ޖައްސާތަން ފެނެ އެވެ. އިތުރު މީހަކު ބޮޑު ހީރަސް ދައްޗަކުން ޖަހަންވެސް އުޅެ އެވެ.

އެ ވީޑިއޯ އާއްމު ވުމާއެކު ފުލުހުން ވަނީ އެ ހަތަރު މީހުން ހޯދައި ހައްޔަރުކޮށްފަ އެވެ.

އެ މީހުންގެ ބަންދު އަމުރުގައި ވާގޮތުން، އެ ހަތަރު މީހުން ޝަރީއަތް ނިމެންދެން ބަންދުކުރަން ދައުލަތުން ކޯޓުގައި ވަނީ އެދިފައެވެ. ނަމަވެސް ކޯޓުން ނިންމީ ޝަރުތު ތަކާއެކު އެމީހުން ދޫކޮށްލަން ހުކުމް ކޮށްފައެވެ.

އެ ހަތަރު މީހުން ކޯޓުން ދޫކޮށްލަން ނިންމާފައިވަނީ ގާޒީ އިބްރާހިމް އިހްސާން އެވެ. އެފަދައިން ނިންމާފައިވަނީ، މައްސަލައިގެ ހެއްކާއި ގަރީނާގެ ގޮތުގައި ހުށަހަޅާފައިވާ ކަންކަމަށް ބަލާއިރު ބަންދުގައި ބެހެއްޓުމަށް އެކަށީގެންވާ މިންވަރަށް ހެކި ހުށަހަޅާފައި ނުވާތީ ކަމަށް ގާޒީ ވަނީ ވިދާޅުވެފަ އެވެ.

މީގެ އިތުރުން ބަންދު އަމުރުގައިވާގޮތުން، އެ މީހުން އެ ތަނަށް ދިޔައީ އެއީ ރައްޓެއްސަކު ހިފާފައިވާ ތަނަކަށްވާތީ އެތަން ސާފުކޮށްދިނުމަށް ކަމަށް އެމީހުން ވަނީ ކޯޓުގައި ބުނެފައެވެ. އަދި އެއްވެސް އެއްޗަކަށްވެސް ގެއްލުން ދީފައި ނުވާނެ ކަމަށް އެ މީހުންނާ ހަވާލާދީ ބަންދު އަމުރުގައި ބުނެފައިވެ އެވެ.