މިދިޔަ އަހަރު ފެމިލީ ޕްރޮޓެކްޝަން އޮތޯރިޓީ، އެފްޕީއޭއަށް ހުށަހަޅާފައިވާ ގެވެށި އަނިޔާގެ މައްސަލަތަކުގެތެރޭގައި އެންމެ ގިނައީ، ފިރިމީހާގެ ފަރާތުން އަނބިމީހާއަށް އަނިޔާ ކުރުމުގެ މައްސަލަތައް ކަމަށް ތަފާސްހިސާބުތަކުން ދައްކައިފިއެވެ.

އެފްޕީއޭގެ ތަފާސްހިސާބުތަކުން ދައްކާގޮތުގައި، މިދިޔަ އަހަރު ޖުމްލަ 722 މައްސަލައެއް އެ އޮތޯރިޓީއަށް ހުށައަޅާފައިވެއެވެ. އޭގެ ތެރެއިން އެންމެ ގިނަ މައްސަލަ ހުށަހަޅާފައިވަނީ ގްރޭޓަރ މާލެ އޭރިއާއިންނެވެ. އެއީ 618 މައްސަލައެވެ.

ތަފާސްހިސާބުތަކުގައިވާގޮތުން 2023 ވަނަ އަހަރު 614 މައްސަލައެއް ވަނީ ހުށައަޅާފައެވެ. އެހެންކަމުން މިދިޔަ އަހަރު އޭގެ ކުރިއަށްވުރެ 108 މައްސަލަ އިތުރަށް ހުށަހަޅާފައިވެއެވެ. 

މީގެ އިތުރުން، އެ އޮތޯރިޓީގެ ތަފާސް ހިސާބުތަކުން އެނގޭ ގޮތުން، ކައިވެނި ކޮށްގެން އުޅޭ ނުވަތަ އިނދެ ވަރިކޮށްފައިވާ މީހާގެ ފަރާތުން އަނިޔާ ލިބިގެން 423 މައްސަލައެއް ހުށައަޅާފައިވެއެވެ. މީގެ ތެރެއިން %89 މައްސަލަ ހުށައަޅާފައިވަނީ ފިރިހެނެއް އެ މީހެއްގެ އަންހެނުންނަށް ނުވަތަ ލޯބިވެރިޔާއަށް ނުވަތަ ކުރީގެ ބައިވެރިޔާއަށް ގެވެށި އަނިޔާކޮށްގެންނެވެ. އަދި އަނެއް %11 އަކީ އަންހެނަކު އޭނާގެ ބައިވެރިޔާއަށް އަނިޔާކުރި މައްސަލައެވެ.

ގެވެށި އަނިޔާއާއި ގުޅޭ ތާވަލެއް: ފޮޓޯ/ އެފްޕީއޭ

މި މައްސަލަތަކުގައި އަނިޔާކޮށްފައިވާ މީހުންގެ ތެރެއިން، %54 އަކީ އިނދެގެން އުޅޭ ފިރިމީހާއެވެ. އަނެއް %27 މައްސަލަތަކުގައި އަނިޔާ ލިބިފައިވަނީ ކުރީގެ ފިރިމީހާގެ ފަރާތުންނެވެ.

މީގެ އިތުރުން ދެވަނައަށް އެންމެ ގިނައިން އަނިޔާ ލިބިގެން ހުށައަޅާފައިވަނީ މައިންބަފައިން ނުވަތަ ބެލެނިވެރިންގެ ފަރާތުންނެވެ. މިފަދަ 305 މައްސަލަ ހުށައަޅާފައިވެއެވެ.

އެއަށްފަހު ދެން އެންމެ ގިނައިން ހުށަހެޅިފައިވަނީ، ނަސަބުގެ ގޮތުން ނުވަތަ ކައިވެނީގެ ގޮތުން ގުޅިފައިވާ ފަރާތްތަކުން އަނިޔާކުރި މައްސަލައެވެ. އެފަދަ 256 މައްސަލަ ވަނީ ހުށަހަޅާފައެވެ.

• ޖިސްމާނީ އަނިޔާކުރުން: 472 މައްސަލަ ހުށައަޅާފައިވޭ

• ބަހުގެ ހަމަލާ ދިނުމާއި ނަފްސާނީ ގޮތުން އަނިޔާކުރުން: 512 މައްސަލަ ހުށައަޅާފައިވޭ

• ބިރުދެއްކުން: 292 މައްސަލަ ހުށައަޅާފައިވޭ

• ގެވެށި އަނިޔާކުރާ ތަން ކުޑަކުއްޖަކަށް ގަސްދުގައި ދެއްކުން ނުވަތަ އެފަދަ ޙާލަތަކަށް ކުއްޖާ ހުށައެޅުން: 199 މައްސަލަ ހުށައަޅާފައިވޭ

• މުދަލަށް ގެއްލުންދިނުން: 131 މައްސަލަ ހުށައަޅާފައިވޭ