ސަޢުދީ ސަރުކާރާއެކު ވަރަށް ގާތުން މަސައްކަތްކުރައްވަން ބޭނުންފުޅުވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ސަޢޫދީ ޢަރަބިއްޔާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މަތުރެކް ބިން ޢަބްދުالله އަލްއަޖަލީން އަލް-ދޯސަރީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަރިހަށް ކުރެއްވި ވަދާޢީ ޒިޔާރަތުގެ ތެރެއިންނެވެ. މި ބައްދަލުވުން ބޭއްވުނީ ހެނދުނު ރައީސް އޮފީހުގައެވެ.
މި ބައްދަލުވުމުގައި ރައީސް މުޢިއްޒު، ވަނީ ސަފީރު ކަމުގައި ހުންނެވި މުއްދަތުގައި ދެއްވާފައިވާ މުހިންމު އެހީތެރިކަމަށް ޝުކުރު އަދާކުރައްވާފައެވެ. އަދި ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެފައިވާކަންވެސް ފާހަގަކުރެއްވިއެވެ. މީގެ އިތުރުން، ރައީސް ވަނީ ސަފީރުގެ ކުރިއަށް އޮތް މަސައްކަތްތަކުގައި ކާމިޔާބު އެދިވަޑައިގެންފައެވެ.
ރައީސް މުޢިއްޒު އިތުރަށް ވިދާޅުވީ ސަޢުދީ ސަރުކާރާއެކު ގާތުން މަސައްކަތްކުރުމަށް ގަސްދުކުރައްވާ ކަމަށާއި، ކުރިއަށް އޮތް މަސްތަކުގައި ދެ ޤައުމުގެ ގުޅުން އިތުރަށް ބަދަހިވާނެ ކަމަށް އުއްމީދުކުރައްވާ ކަމަށެވެ. އަދި މިދިޔަ މެއި މަހު އުމްރާއަށް ވަޑައިގެންނެވި ދަތުރުފުޅުގައި ސަޢުދީ ސަރުކާރުން ދެއްވި ހޫނު މެހެމާންދާރީ ފާހަގަކުރައްވައި ޝުކުރު އަދާކުރެއްވިއެވެ.
މި ބައްދަލުވުން ނިމުނީ ރާއްޖެއާއި ސަޢުދީ ޢަރަބިއްޔާއާ ދެމެދު އޮތް ގުޅުން އިތުރަށް ހަރުދަނާކުރުމަށް މަސައްކަތްކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާއާއި ސަޢުދީ ޢަރަބިއްޔާގެ ސަފީރު ދެއްވިއެވެ.
Advertisement
This content is created and paid for by advertisers and does not involve Voice Journalists
