ހދ. ހަނިމާދޫގައި ބިނާކުރަމުންދާ 500 މީހުންގެ ޖާގައިގެ މިސްކިތް ނިންމުމުގެ މަސައްކަތް ސަރުކާރުން އެމްޓިސިސީއާއި ހަވާލުކޮށްފިއެވެ.

މި މަޝްރޫޢު ހަވާލުކުރުމަށް މިއަދު ބޭއްވުނު ރަސްމިއްޔާތުގައި އެމްޓިސިސީގެ ފަރާތުން ސޮއިކުރެއްވީ ކުންފުނީގެ މެނޭޖިންގ ޑައިރެކްޓަރ (ރިޓަޔަރޑް) އަޙްމަދު ސަޢުދީއެވެ. އަދި މިނިސްޓްރީ އޮފް އިސްލާމިކް އެފެއާޒްގެ ފަރާތުން ސޮއިކުރެއްވީ މިނިސްޓަރ އޮފް އިސްލާމިކް އެފެއާޒްގެ ނައިބު އިބްރާހިމް އާސިމްއެވެ.

ހަނިމާދޫ މިސްކިތް ނިންމުމުގެ މަސައްކަތް އެމްޓީސީސީއާ ހަވާލުކުރުން: ފޮޓޯ/ އެމްޓީސީސީ

މި މަޝްރޫޢުގެ ދަށުން، 7,933 އަކަ މީޓަރުގެ ސަރަހައްދެއްގައި 500 މީހުންގެ ޖާގައިގެ މިސްކިތެއް ބިނާކުރުން ހިމެނެއެވެ. މި މަޝްރޫޢަކީ 9.44 މިލިއަން ރުފިޔާއަށް 360 ދުވަސްތެރޭ ނިންމުމަށް ހަވާލުކުރެވިފައިވާ މަޝްރޫޢެކެވެ.

ހދ. ހަނިމާދޫއަކީ 2،645 މީހުންގެ ބޮޑު އާބާދީއެއް އޮންނަ ރަށެކެވެ. ހަނިމާދޫގައި އެއަރޕޯޓެއް ގާއިމުކުރެވިފައި އޮތުމުގެ ސަބަބުން ގިނަ އަދަދެއްގެ ދިވެހި ރައްޔިތުންނާއި ފަތުރުވެރިން މި ސަރަހައްދަށް ޒިޔާރަތްކުރާ މަންޒިލެއްގެ ގޮތުގައި މިރަށްވަނީވެފައެވެ.