ބިދޭސީންނާ ގުޅުންހުރި ފީތަކުން ދައުލަތަށް އަދިވެސް 900 މިލިއަނެއްހާ ރުފިޔާ ނުލިބި އެބައޮތްކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނެފިއެވެ.

ދައުލަތުގެ މީޑިއާގައި ވާހަކަދައްކަވަމުން އެ ވުޒާރާގެ ސްޓޭޓް މިނިސްޓަރ ޢަބްދުލްމަޖީދު އިބްރާހީމް ވިދާޅުވީ، އަދުގެ ސަރުކާރު ވެރިކަމާ ހަވާލުވުމަށްފަހު، ރާއްޖޭގައި މަސައްކަތް ކުރަމުން އަންނަ ބިދޭސީންގެ ފަރާތުން ދައުލަތަށް ދައްކަންޖެހޭ ފީތައް ހޯދުމުގެ މަސައްކަތް ހާއްސަ އިސްކަމެއްދީގެން ފަށާފައިވާކަމަށެވެ. މިކަން ފެށިއިރު، ބިދޭސީންނާ ގުޅުންހުރި ފީތަކުން 1.7 ބިލިއަން ރުފިޔާ ނުލިބި އޮތްކަން ފާހަގަކުރައްވަމުން މަޖީދު ވިދާޅުވީ، މިހާރު އެއަދަދު ކުޑަކުރެވިފައިވާކަމަށެވެ. ނަމަވެސް މިހާތަނަށް ކުރެވުނު މަސައްކަތުން 1.1 ބިލިއަން ރުފިޔާ ލިބިފައިވާކަމަށް އޭނާ ވިދާޅުވިއެވެ.

މި ސަރުކާރާ ޤައުމު ހިންގަން ހަވާލުވިއިރު ބިދޭސީންގެ ފަރާތުން ދައްކަންޖެހޭ ފީތައް ދައްކަމުންދިޔައީ 22.72 އިންސައްތަ މީހުންކަމަށާއި، ނަމަވެސް މިހާރު އެ ނިސްބަތް 55.4 އިންސައްތައަށް އަރާފައިވާކަމަށެވެ. ރައީސް ޑރ.މުއިއްޒު ވެރިކަމާ ހަވާލުވުމަށްފަހު ބިދޭސީންގެ ފަރާތުން ދައްކަންޖެހޭ ފީތައް ދެއްކުމުގައި ހޯމް މިނިސްޓްރީގެ ފަރާތުން ވަނީ ފިޔަވަޅުތަކެއް އަޅާފައެވެ. މިގޮތުން ބިދޭސީންގެ ފީތައް ނުދައްކާ ކުންފުނިތަކުގެ ވަނަވަރު ވަނީ އާއްމުކޮށްފައެވެ. މިގޮތުން އެފަދަ ފަރާތްތަކުގެ ނަންތައް އާއްމުކުރިއިރު، އޭގެ ފަހުން އެފަރާތްތަކުން ފައިސާ ދައްކަމުން ގެންގޮސްފައިވާކަން ފާހަގަކޮށްލެވެއެވެ. އެގޮތުން ފައިސާ ނުދައްކާ ތިބި ފަރާތްތަކަށް ފައިސާ ދެއްކުމުގައި ލުއި އިންތިޒާމްތަކެއް ވަނީ ހަމަޖައްސައިދީފައެވެ

Advertisement

މަޖީދު ވިދާޅުވީ ބިދޭސީންގެ ކަންކަން ހަރުދަނާކުރުމަށް ސަރުކާރުން ކުރިއަށްގެންދާ މަސައްކަތްތައް ކާމިޔާބުކަމަށެވެ. ބިދޭސީންގެ ކަންކަން ހަރުދަނާ ކުރުމަށް ސަރުކާރުން ވަނީ އޮޕަރޭޝަނެއް ފަށާފައެވެ. އެ ޕްރޮގްރާމުގެ ދަށުން ރާއްޖޭގައި މަސައްކަތްކުރާ ބިދޭސީންގެ ބަޔޯމެޓްރިކް ޑޭޓާތައް ނެގުމުގެ މަސައްކަތް ފަށާފައެވެ. މިގޮތުން މިހާތަނަށް 80،000 ހާހަށްވުރެ ގިނަ ބިދޭސީންގެ މައުލޫމާތު ވަނީ ނަގާފައެވެ. މީގެ އިތުރުން ބިދޭސީންގެ ފަރާތުން ދައުލަތަށް ދައްކަންޖެހޭ ފީތައް ނުދައްކާ ފަރާތްތަކަށް ޚިދުމަތްދިނުން މެދުކަނޑާލަމުންދާކަންވެސް ފާހަގަކޮށްލެވެއެވެ.