ފ.އަތޮޅުގެ ރައްޔިތުންނަށް އެއާޕޯޓެއްގެ ހިދުމަތް ލިބޭނޭގޮތް ހައްދަވައިދެއްވުމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރ ޢަބްދުﷲ ޝާހިދު ސަރުކާރަށް ގޮވާލައްވައިފިއެވެ.
ފ.އަތޮޅު މަގޫދޫ އެއާޕޯޓްގެ މަސައްކަތަށް އެރަށަށް ގެންގޮސްފައިވާ ވެލްޑިން މެޝިނެއް ގެންދަން އުޅުމުގެ ތެރޭގައި ރަށު ރައްޔިތުންގެ ތެރެއިން ބަޔަކު ނިކުތް މައްސަލާގައި އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ނިމިދިޔަ އެމްޑީޕީ ސަރުކާރުން ތަރައްޤީ ކުރަން ފަށާފައިވާ ފ.މަގޫދޫ އެއާޕޯޓުގެ މަސައްކަތުގެ ބޮޑުބައި ނިމިފައި ވަނިކޮށް، އެ މަސައްކަތް ހުއްޓާލި ހުއްޓާލުން ކުށްވެރިކުރާ ކަމަށެވެ.
ޝާހިދު ވިދާޅުވީ، ސަރުކާރު ބަދަލުވުމުން ކުރީ ސަރުކާރުތަކުން ކުރިއަށް ގެންގޮސްފައިވާ ޕްރޮޖެކްޓްތަކަށް ބަދަލުގެނައުމާއި، ހުއްޓާލުމަކީ ދައުލަތަށް ނުހަނު ގެއްލުންވާކަމެއް ކަމަށެވެ. އަދި އެކަމަކީ ރައްޔިތުންގެ ފައިސާއިން ކުރާ އިސްރާފެއް. އަދި ޚިޔާނާތެއް ކަމަށެވެ.
މިގޮތުން ޝާހިދު ވަނީ މަގޫދޫ އާއި ފ.އަތޮޅުގެ ރައްޔިތުންނަށް އެއާޕޯޓުގެ ޚިދުމަތް ލިބޭނެ މަގު ފަހިކޮށް ދިނުމަށް ރައީސް މުޢިއްޒުގެ ސަރުކާރަށް ގޮވާލާފައެވެ.
މި މައްސަލާގައި މަގޫދޫ އެއާޕޯޓުގެ މަސައްކަތް ކުރިއަށްގެންދާ އެމްޓީސީސީން ބުނެފައިވަނީ، މަގޫދޫއިން ގެންދަން އުޅުނީ އެއާޕޯޓް އެޅުމުގެ މަސައްކަތަށް ބޭނުންކުރާ ވެލްޑިން މެޝިނެއް ކަމަށާއި، އެ މެޝިން ގެންދަން އުޅުނީ މުލީ އެއާޕޯޓްގެ މަސައްކަތަށް މިވަގުތު އެ ބޭނުންވެގެން ކަމަށެވެ. އެގޮތުން އެ ވެލްޑިން މެޝިނަކީ މިވަގުތު މަގޫދޫ އެއާޕޯޓްގެ މަސައްކަތަށް ބޭނުންނުވާ މެޝިނެއްކަމަށް އެމްޓިސީސީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
