ކޮރަޕްޝަންގެ ތުހުމަތުކޮށް މޯލްޑިވްސް އިމިގްރޭޝަންގެ ކޮންޓްރޯލަރުކަމުން ވަކިކުރި މުހައްމަދު ޝަމްއާން ވަހީދު ހައްޔަރުކޮށް، އޭނާގެ ބަންދުކުރި މައްސަލައިގައި އޭނާގެ ފަރާތުން ހައިކޯޓަށް ހުށަހެޅި އިސްތިއުނާފު ބަލައިގަތުމަށް އެ ކޯޓުގެ ފަނޑިޔާރުން އިއްޔެ ނިންމަވައިފިއެވެ.

ބިދޭސީން އަތުން ނާޖައިޒު މަންފާ ހޯދުމުގެ ތުހުމަތުގައި ޝަމްއާން ހައްޔަރު ކުރީގެ މާރިޗު މަހުގެ 21 ވަނަ ދުވަހުގެ ރޭގެ ވަގުތެއްގަ އެވެ. ޝަމްއާންގެ ބަންދާމެދު ގޮތް ނިންމަން ކޯޓަށް ހާޒިރު ކުރުމުން 15 ދުވަހުގެ ބަންދުގެ މުއްދަތެއް ޖަހާފައިވެ އެވެ.

އެއާއެކު ޝަމްއާންގެ ފަރާތުން އެ މައްސަލަ ވަނީ ހައިކޯޓަށް ހުށައަޅާފަ އެވެ. އެގޮތުން ޝަމްއާންގެ މައްޗަށް ހިންގާ ތަހުގީގުގައި އޭސީސީގެ ދައުރެއް ނެތުމާއި އެ މައްސަލަ ފުލުހުންގެ މުއައްސަސާއިން އެކަނި ތަހުގީގު ކުރުމަކީ ޖިނާއީ އިޖުރާތާ ހިލާފު ކަމެއްކަން ފާހަގަކޮށް އެ މައްސަލަ ބަލައި ބަންދުގެ މުއްދަތު ރިވިއު ކޮށްދޭން އޭނާ ވަނީ އެދިފަ އެވެ.

ނަމަވެސް ދަށު ކޯޓްގެ ނިންމުމަށް ބަދަލު ގެނެސް ހައިކޯޓުން އެ މައްސަލާގައި އިތުރަށް ނިންމަން ޖެހޭ ނިންމުމެއް ނެތް ކަމަށް ނިންމާ ހައިކޯޓްގެ ރަޖިސްޓްރާ ވަނީ މައްސަލަ ރަޖިސްޓްރީ ނުކުރަން ނިންމާފަ އެވެ.

ރަޖިސްޓްރާގެ ނިންމެވުން އިސްތިއުނާފު ކުރުމުން އެ މައްސަލަ ބެއްލެވީ ފަނޑިޔާރު ހުޒައިފާ މުހައްމަދާއި ފަނޑިޔާރު ފާތިމަތު ފަރުހީޒާގެ އިތުރުން ފަނޑިޔާރު މުހައްމަދު ސަލީމެވެ.

އެ ތިން ފަނޑިޔާރުންގެ އިއްތިފާގުން ވަނީ ރަޖިސްޓްރާގެ ނިންމުން ބާތިލުކުރައްވައި، މައްސަލަ ބަލަން ނިންމަވައިފައެވެ.

އެގޮތުން، މިހާރު ކުރިއަށްދާ މަރުހަލާގެ ބޭނުމަށް ހުށަހަޅައިފައިވާ ނުކުތާތަކުގައި ގާނޫނީ ބަހުސެއް އޮތް ކަމަށް ބެލެވޭ ކަމަށް ވިދާޅުވެ ރަޖިސްޓްރާގެ ނިންމެވުން ރަނގަޅު ނޫން ކަމަށް ފަނޑިޔާރު ހުޒައިފާ ނިންމެވިއިރު، ފަނޑިޔާރު ފަރުހީޒާ އެ ރައުޔަށް ތާއިދުކުރެއްވިއެވެ.

އަދި ފަނޑިޔާރު މުހައްމަދު ސަލީމް ވަނީ ރަޖިސްޓްރާގެ ނިންމުން މުރާޖާ ކުރުމަށް އެދި ހުށަހެޅި ސަބަބުތަކުގެ މައްޗަށް ބަލާއިރު، އެ މަރުހަލާގެ ބޭނުމަށް، އިސްތިއުނާފީ އޮޅިގަނޑު ގިރާކުރާ ފަދަ ގާނޫނީ ބަހުސެއް އޮތް ކަމަށް ދެކެވޭކަން ފާހަގަކުރައްވާފައެވެ.

އެހެންކަމުން، ރެޖިސްޓްރާގެ ނިންމެވުން ބާތިލް ކުރައްވައި މައްސަލަ ބަލައިގަންނަން ވަނީ ނިންމަވާފައެވެ.