ޤައުމީ ފެންކުންފުނި، އެމްޑަބްލިއުއެސްސީން ރޯދަމަހު ކުރިއަށްގެންދިޔަ އެމްޑަބްލިއުއެސްސީގެ އެޕްލިކޭޝަން މެދުވެރިކޮށް ފެންބިލް ދައްކާ ޑޮމަސްޓިކް ކަސްޓަމަރުންނަށް އުމްރާ ދަތުރު ލިބޭ ޕްރޮމޯޝަނުގެ ނަސީބުވެރި ފަރާތްތަކަށް އެކަމުގެ ރަސްމީ ލިޔުން ހަވާލުކޮށްފިއެވެ.

އެމްޑަބްލިއުއެސްސީން މި ޕްރޮމޯޝަން ކުރިއަށްގެންގޮސްފައިވަނީ އެކުންފުންޏަށް 30 އަހަރު ފުރުމާއި ގުޅުވައިގެން "އެކުވެރި ރޯދަ30" ނަމުގައެވެ. ޕްރޮމޯޝަނުގެ ނަސީބުވެރިންގެ ގޮތުގައި ހޮވިފައިވަނީ، ދަފްތަު ނަމްބަރު 1672 ޝަމްރޫޒް އިބްރާހިމާއި، ތ.ތިމަރަފުށީ އުދަރެސް މުހައްމަދު ސަރާހް އާއި ގ.ރަންދެލިގެ އަލީ ނާޒިމެވެ.

އެމްޑަބްލިއުއެސްސީގައި ބޭއްވި ހަފްލާއެއްގައިވަނީ އުމްރާ ދަތުރުތައް ލިބޭ ފަރާތްތަކަށް އެކަމުގެ ލިޔުން ހަވާލުކޮށްފައެވެ. ލިޔުން ހަވާލުކޮށްދެއްވީ އެމްޑަބްލިއުއެސްސީގެ ޗެއާޕާސަން ޝަމްހޫޒާ އަހްމަދާއި، ބޮދް މެމްބަރުންނެވެ.

Advertisement

ފެން ކުންފުނިން ބުނީ އެފަރާތްތަކަށް އުމްރާ ދަތުރުތައް ހަމަޖައްސައިދޭނީ މޯލްޑިވްސް ހައްޖު ކޯޕަރޭޝަން މެދުވެރިކޮށް ކަމަށެވެ. ޕްރޮމޯޝަން ކުރިއަށްގެންދިޔައީ 1 މާރޗުން ފެށިގެން 31 މާޗްގެ ނިޔަލަށެވެ.

މި ޕްރޮމޯޝަނުގެ މަޤްސަދަކީ ރަމަޟާންމަހާ ގުޅުވައިގެން ކަސްޓަމަރުންނަށް ފަހި ފުރުސަތެއް ތަނަވަސްކޮށްދިނުމާއެކު، ވީހާވެސް ގިނަ ކަސްޓަމަރުން އެމްޑަބްލިއު އެސްސީގެ އެޕަށް އަހުލުވެރިކުރުވުމެވެ. އަދި ބިލް ދެއްކުމަށް ކައުންޓަރުޓަރުތަކަށް އައުމުގެ ބަދަލުގައި އެޕް ފަދަ ޒަމާނީ ވަސީލަތްތައް ބޭނުންކުރުމަށް ބާރުއަޅައި، ކައުންޓަރަށް އައުމުގެ ބަދަލުގައި އެޕުން ބިލްތައް ދައްކައި ވަގުތު ސަލާމަތްކުރުމެވެ. މީގެ އިތުރުން އެމްޑަބްލިއުއެސްސީގެ ހިދުމަތްތައް ޑިޖިޓަލްކޮށް ފަސޭހަކޮށް ޒަމާނީ ކުރުމުގެ މަސައްކަތަށް ހަލުވިކަމާއެކު ކުރިއެރުން ހޯދުމެވެ.

އެމްޑަބްލިއުއެސްސީން ބުނީ ބޭނުންނަމަ އުމްރާ ދަތުރު އެހެން މީހަކަށް ހަދިޔާކުރެވިދާނެ ކަމަށާއި، ނަމަވެސް އުމްރާ ދަތުރު ފައިސާއަށް ބަދަލު ނުކުރެވޭނޭ ކަމަށެވެ.