އާއިލާ އިން މިހާރު ބޭނުންވަނީ ޒަކިއްޔާގެ ހަށިގަނޑު ނަގާ އޮޓޮޕްސީ ހެދުމަށް
ނ. ހޮޅުދޫގައި ޒަޚަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާ މަނިކުގެ މަރުގެ މައްސަލަ ތަހުގީގަށް އޭނާގެ ހަށިގަނޑު ނަގާ އޮޓޮޕްސީ ހެދުމަށް އާއިލާގެ ބަޔަކު އެދިއްޖެ އެވެ.
ޒަކިއްޔާގެ އާއިލާގެ ބަޔަކު ވަނީ އެ މީހުން އެ ހުށައެޅުން ހިމަނާ ހޯމް މިނިސްޓަރު އަލީ އިހްސާން އާއި ޕްރޮސެކިއުޓަރު ޖެނެރަލް އައްބާސް ޝަރީފަށް ސިޓީއެއް ފޮނުވާފަ އެވެ. އެ ސިޓީގައި ބުނެފައި ވަނީ ޒަކިއްޔާގެ މަރާއި ގުޅިގެން ހެދި ވާޗުއަލް އޮޓޮޕްސީގެ ނަތީޖާ ގަބޫލު ކުރަން ދަތި ކަމަށެވެ.
އެ ރިޕޯޓްގައި ޒަކިއްޔާ މަރުވީ އަމިއްލައަށް ކަމަށް ބުނި ނަމަވެސް އިންސާނަކު އޭނާގެ ކަރުގަައި ފަސް ފަހަރު ވަޅި އަޅައިގެން އަމިއްލައަށް މަރުވެދާނެ ކަަމަށް ގަބޫލު ކުރަން ދަތި ކަމަށެވެ. އެ މީހުން އެދިފައި ވަނީ މިނިވަން ކަމާއެކު އޮޓޮޕްސީ ހެދުމަށެވެ. އެހެން ކަމުން ކަށްވަޅު ކޮނެ އަލުން ހަށިގަނޑު ނަގާ އޮޓޮޕްސީ ހެދުމަށް އެދިފައިވެ އެވެ.
އެއީ މިހާތަނަށް ރާއްޖޭގައި ވެސް ނުކުރާ ކަމެއް ނޫން ކަމަށާ އެހެން ކަމުން އެކަމާއި ގުޅޭގޮތުން މަޝްވަރާ ކުރަން އެދޭ ކަމަށް ވަނީ ބުނެފަ އެވެ.
މިދިޔަ އަހަރުގެ ސެޕްޓެމްބަރ 10 ވަނަ ދުވަހުގެ ހެނދުނުގެ ވަގުތެއްގައި ޒަކިއްޔާ މަރުވި މައްސަލަ ތަހުގީގުކުރުމުގައި ފުލުހުން އިހުމާލުވި ކަމަށް ބުނެ، އާންމު ރައްޔިތުން ފުލުހުންގެ މައްޗަށް ސީރިއަސް ތުހުމަތުތަކެއް ކޮށްފައިވެ އެވެ. އަދި ޒަކިއްޔާ މަރުވީ އަމިއްލައަށް ނޫން ކަމަށާ އެއީ ބަޔަކު / މީހަކު ކުރި ކަމެއް ކަމަށް އާއިލާގެ ގިނަ މީހުންނާއި އެ ރަށުގެ ގިނަ ބަޔަކު ދެކެ އެވެ.
މީގެ ކުރީން އެ މައްސަލާ ގައި އެ ރަށުގައި ސިލްސިލާ ކޮށް މުޒާހަރާ ވެސް ކޮށްފައިވެ އެވެ.
Advertisement
This content is created and paid for by advertisers and does not involve Voice Journalists
