ރަޖިސްޓްރީ ނުކުރާ އެއްވެސް އުޅަނދެއް މިހާރު މާލެއާއި ހުޅުމާލޭގެ މަގުތަކުގައި ނުހުންނާނެ ކަމުގެ ޔަގީންކަން ދަތުރުފަތުރާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. 

ދައުލަތުގެ މީޑިއާއިން ގެނެސްދިން "ރާއްޖެ މިއަދު“ ޕްރޮގްރާމްގައި ވާހަކަދައްކަވަމުން އަމީން ވިދާޅުވީ، މަގާމާއި ހަވާލުވެޑައިގެންނެވި އިރު، މާލޭ މަގުތަކުގަޔާއި، ބަސް ދުއްވާ ރޫޓް ތަކުގައި، ހޮސްޕިޓަލް ތަކާއި ސުކޫލްތަކުގެ ކުރިމަތީގައި، އެއްވެސް ބެލުމެއްނެތި އުޅަނދުތައް ޕާކު ކުރުމުގެ މައްސަލަ ވަރަށް ބޮޑު ކަމަށެވެ. 

ވަޒީރު ވިދާޅުވީ، ބޭނުން ނުކޮށް ހުންނަ އުޅަނދުތަކުގެ މައްސަލަ މިހާރު ވަރަށް ބޮޑަށް ހައްލު ކުރެވިފައިވާ ކަމަށާ، އެ މައްސަލަ ހައްލު ކުރުމަށް، އެފަދަ އުޅަނދުތައް ޕާކުކޮށްފައި ބަހައްޓާނެ ތަންތަން ސަރުކާރުން ދައްކާފައިވާނެ ކަމަށެވެ. އެގޮތުން 1000 އަށްވުރެ ގިނަ އުޅަނދު ޕާކުކުރާނެ ޖާގަ ވަގުތީ ގޮތުން ހަދައި ދައްކާަފައިވާނެ ކަމަށާ، އެތަން ތަނަށް ނުގެންދާ ވެހިކަލްތައް ނަގައި ޓޯވ ކުރެވުނީ ނަގާނެ މުއްދަތުވެސް ދިނުމަށް ފަހުގައި ކަމަށް ވަޒީރު ވިދާޅުވިއެވެ.

ކަން މިހެން ހުރި ނަމަވެސް، އަދިވެސް ރައްޔިތުން ބޭނުންވާ މިންވަރަށް މަގުތަކަށް ލުއި ނުލިބޭކަން ފާހަގަކުރައްވައި ވަޒީރު ވިދާޅުވީ، އެ ލުއި ނުލިބެނީ އެ މައްސަލަ ގޯސްވެފައި އޮތް މިންވަރު ބޮޑުކަމުން ކަމަށެވެ.

އެ މައްސަލަތައް ހައްލު ކުރުމަށް މިހާރު ގަވާއިދެއް އެކުލަވާލެވިފައިވާ ކަމަށާ، އެ ޤަވައިދު ދެތިން ދުވަހުގެ ތެރޭގައި ގެޒެޓް ކުރެވިގެންދާނެކަމަށް ވަޒީރު ވިދާޅުވިއެވެ. އަދި އެ ޤަވައިދާއެކު، ދެން އެތެރެކުރެވޭ ވެހިކަލްތައް އެތެރެ ކުރެވޭނީވެސް ރެޖިސްޓަރ ކުރާނެ ގަރާޖެއް އޮވެގެން ކަމަށާ، ނުވަތަ ވިޔަފާރި އުސޫލުންވެސް އެކަން ކުރާ ފަރާތްތަކަށް ވެސް އެ އުޅަނދު ބަހައްޓާނެ ތަނެއްނެތި އުޅަނދު އެތެރެ ނުކުރެވޭނެ ކަމަށް ވަޒީރު ވިދާޅުވިއެވެ.