ސަރުކާރުގެ މަސައްކަތްތަކާ ގުޅޭ ފަހުގެ މަޢުލޫމާތު ހާމަކުރުމަށް ވަޒީރުންނާއިއެކު ކުރިއަށްގެންދާ "އަހާ ފޯރަމް" މިމަހުގެ 24ވާ ބުރާސްފަތި ދުވަހުގެ ރޭ ބާއްވާ ގޮތަށް ހަމަޖެހިއްޖެއެވެ. ފޯރަމް ބޭއްވުމަށް ހަމަޖެހިފައިވަނީ އެރޭ 9:00 ގައެވެ.

ރައީސް އޮފީހާއި ދައުލަތުގެ މީޑިއާ، ޕީއެސްއެމްއިން ގުޅިގެން ބާއްވާ މިރޭގެ ފޯރަމްގައިވެސް ފަސް ވަޒީރަކު ބައިވެރިވެވަޑައިގަންނަވާނެ ކަމަށް ރައީސް އޮފީހުން މައުލޫމާތު ދެއެވެ.

އެގޮތުން ބައިވެރިވެވަޑައިގަންނަވާނީ؛

1) ދާޚިލީ ސަލާމަތާއި ފަންނިއްޔާތާބެހޭ ވަޒީރު: ޢަލީ ޢިޙްސާން

2) އެޓާނީ ޖެނެރަލް: އަޙްމަދު އުޝާމް

3) މިނިސްޓަރ އޮފް އެޑިޔުކޭޝަން: ޑރ. އިސްމާޢީލް ޝަފީޢު

4) މިނިސްޓަރ އޮފް ދިވެހި ލެންގުއޭޖު ކަލްޗަރ އެންޑް ހެރިޓޭޖް: އާދަމް ނަސީރު އިބްރާހީމް

5) މިނިސްޓަރ އޮފް އެޖްރިކަލްޗަރ: ޑރ. މަރިޔަމް މާރިޔާ

މި ފޯރަމްގައި ބައިވެރިވެ ސުވާލު ކުރުމުގެ ފުރުސަތު އާއްމުކޮށް ހުޅުވާލާފައިވާއިރު ފޯނުން ގުޅައިގެންނާއި ސޯޝަލް މީޑިއާ މެދުވެރިކޮށް އަދި އެސްއެމްއެސް މެދުވެރިކޮށް ސުވާލު ކުރުމުގެ ފުރުސަތުވެސް މިހާރު ހުޅުވާލާފައިވާ ކަމަށް ޕީއެސްއެމްއިން ބުނެއެވެ.

އެގޮތުން އެސްއެމްއެސް މެދުވެރިކޮށް ސުވާލުކުރަން ބޭނުންނަމަ AH ޖެހުމަށްފަހު ހުސްތަންކޮޅެއް ދޫކުރުމަށްފަހު ކުރަން ބޭނުންވާ ސުވާލު ލިޔުމަށްފަހު 300 އަށް ފޮނުވަން އެދިފައިވެއެވެ. 

އަހާ ފޯރަމަކީ ކޮންމެ ދެ މަހުން އެއްމަހު ވުޒާރާތަކުގެ ވަޒީރުން ހިމެނޭހެން ކުރިއަށްގެންދާ ފޯރަމެކެވެ.