އަންނަ ޖުލައި މަހުގެ ފުރަތަމަ ހަފުތާގެތެރޭގައި ސަރުކާރުގެ ޓެކްސީ ލައިންގެ ޚިދުމަތް ފެށޭނެ ކަމަށް ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަ ދައްކަވަމުން ވަޒީރު ވިދާޅުވީ، ޓެކްސީ ލައިން ޤާއިމްކުރުމަށް ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ،އެމްޓީސީސީއާ ކަމަށެވެ. އަދި އެ ކުންފުނިން އަންނަނީ މިއަހަރުގެ މެދުތެރޭގައި ޓެކްސީ ލައިންގެ ޚިދުމަތް ފެށުމަށް ތައްޔާރުވަމުން ކަމަށް ވެސް ވަޒީރު ވިދާޅުވިއެވެ.

ޓެކްސީ ލައިނަށް ބޭނުންވާ ޓެކްސީ ފޯރުކޮށްދޭނެ ބަޔަކު ހޯދަން އެމްޓީސީސީން އިއުލާންކޮށް، އެޓެކްސީތައް ފޯރުކޮށްދޭނެ ބަޔަކު މިހާރު ހަމަޖެހިފައިވާ ކަން ފާހަގަކުރައްވަމުން ވަޒީރު ވިދާޅުވީ ޓެކްސީ ލައިނަށް ބޭނުންވާ އެޕްލިކޭޝަން ހެދުމުގެ މަސައްކަތާއި ޓެކްސީތައް ޗަރޖު ކުރާނެ ޗަރޖިން ސްޓޭޝަންތައް ހެދުމުގެ މަސައްކަތްވެސް އެ ކުންފުނިން ކުރަމުންދާ ކަމަށެވެ.

މީގެ އިތުރުން، ވަޒީރު ވިދާޅުވީ ޓެކްސީ ލައިން ތައާރަފްކުރުމުގެ މައިގަނޑު މަޤްޞަދަކީ ސްޓޭންޑަޑް ކަނޑައަޅައި ޓެކްސީ ލައިންތައް ޑިސިޕްލިންކޮށް ޕަބްލިކް އެކްސްޕެކްޓޭޝަނާ އެއްވަރަށް ޚިދުމަތް ދިނުން ކަމަށެވެ.

އިތުރަށް ވަޒީރު ވިދާޅުވީ، ޓެކްސީގެ ޚިދުމަތް ދޭ ފަރާތްތަކުން އަމިއްލަ ކާރުގައި ނުވަތަ ކުއްޔަށް ކާރު ނަގައިގެން ޚިދުމަތް ދޭއިރު މެއިންޓަންސްފަދަ ކަންކަމަށް ބޮޑެތި ޚަރަދުކުރަންޖެހޭ ކަމަށާއި ސަރުކާރުގެ ޓެކްސީ ލައިނާ ގުޅުމުން އެފަދަ ޚަރަދެއް ކުރަން ނުޖެހި، ވަޒީފާ އަދާކުރުމުގެ ފުރުޞަތު ލިބިގެންދާނެ ކަމަށެވެ.

އަދި އަދާކުރާ ވަޒީފާގެ އިތުރަށް ހުސްވަގުތުތަކުގައި ޓެކްސީގެ ޚިދުމަތް ދޭން ބޭނުންވާ ފަރާތްތަކަށް އެ ފުރުޞަތުވެސް ލިބިގެންދާނެ ކަން ފާހަގަކުރައްވަމުން ވަޒީރު ވިދާޅުވީ 50 އިންސައްތަ ފުރުޞަތު ޚާއްސަކޮށްފައިވަނީ އެފަދަ ފަރާތްތަކަށް ކަމަށެވެ. ސަރުކާރުގެ ޓެކްސީ ލައިނެއް ތައާރަފުކުރެވުނު ނަމަވެސް މިހާރު ޓެކްސީގެ ޚިދުމަތްދޭ ޑްރައިވަރުންނަށް އެއްވެސް ދެރަގޮތެއް ނުވާނެ ކަމުގެ ޔަގީންކަން ވަޒީރު އަމީން ވަނީ ދެއްވާފައެވެ.