ރާއްޖޭގެ ލާމަރުކަޒީ ނިޒާމު ހަރުދަނާކޮށް، ރައްޔިތުން ބާރުވެރި ކުރުވުމުގެ ސަޤާފަތެއް އުފެެއްދުމަށްޓަކައި ސަރުކާރުން ކުރަމުން އަންނަ މަސައްކަތުގެ ދަށުން، "ރަށްވެހީންގެ ސައްލާ" އއ. އުކުޅަހުގައި ފަށައިފިއެވެ.
މި މަޝްވަރާ ބައްދަލުވުން ފެށުމުގެ ރަސްމިއްޔާތުގައި މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް އާދަމް ޝަރީފު އުމަރުގެ އަރިހުގައި ބްރިޓިޝް ހައިކޮމިޝަނަރ ހިޒް އެކްސެލެންސީ ނިކޮލަސް ޑޭވިޑް ލޯވއާއި، ޑެޕިޔުޓީ ހެޑް އޮފް ސައުތު އޭސިއާ ރީޖަނަލް ޑިޕާޓްމެންޓް އޮފް ދަ ޔޫކޭ ގަވރމަންޓް މިސް ކެމިލާ ސަގްންއާއި، ޑެޕިޔުޓީ ރެޒިޑެންޓް ރެޕްރެޒެންޓެޓިވް އޮފް ދަ ޔޫއެންޑީޕީ މިސް ޕެކް ޗްއާން ގާންއާއި އަދި އެލްޖީއޭގެ ސިއީއޯ ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަދައްކަވަމުން ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް މިނިސްޓަރު އާދަމް ޝަރީފު ވިދާޅުވީ، ލާމަރުކަޒީ ނިޒާމުގެ ތެރެއިން ރައްޔިތުން ބާރުވެރިކުރުވުމަށްޓަކައި ކައުންސިލްތަކުން މުހިއްމު މަސައްކަތްތަކެއް ކޮށްފައިވާކަަމަށެވެ. ލާމަރުކަޒީ ނިޒާމަކީ ދިވެހިންނަށް އާ ނިޒާމެއް ނޫންކަން ފާހަގަކުރައްވަމުން މިނިސްޓަރު ވިދާޅުވީ، ލާމަރުކަޒީ ނިޒާމަށް ޤާނޫނީ ބާރުވެރިކަން ލިބިގެންދިޔައީ މިހާރު އަމަލުކުރަމުން އަންނަ ފެހި ޤާނޫނު އަސާސީއަށް އަމަލުކުރަން ފެށުމާއެކު ކަމަށެވެ.
މިނިސްޓަރު އާދަމް ޝަރީފް ވިދާޅުވީ، ރަށްވެހިންގެ ފޯރަމަކީ، ލާމަރުކަޒީ ނިޒާމު ހަރުދަނާކުރުމުގައި ވަރަށް މުހިންމު، އަދި އޭގެ ސަބަބުން ވަރަށް ބޮޑެތި ކުރިއެރުންތައް ލިބޭނެ ފޯރަމެއް ކަމަށެވެ. އަދި ހަމަ އެއާއެކީގައި ރައްޔިތުންގެ ބައިވެރިވުން މި ނިޒާމަށް މުހިންމުވާކަން މި ފޯރަމުން އެނގިގެންދާކަމަށް މިނިސްޓަރު ވިދާޅުވިއެވެ.
އަޅުގަނޑު ގަބޫލުކުރަނީ މިކަމުގެ ސަބަބުން މި ނިޒާމު ހަރުދަނާކުރުމުގައި ހާއްސަކޮށް، ކައުންސިލްތަކަށް ދިމާވާ ގޮންޖެހުންތަކަށް ރައްޔިތުންގެ ބައިވެރިވުން ހޯދާނެ ގޮތްތަކާ ބެހޭގޮތުން އިތުރު މަޝްވަރާތައް ކުރެވިގެން ދާނެ،
ވަޒީރު އާދަމް ޝަރީފް
ވަޒީރު އާދަމް ޝަރީފް "ރަށްވެހީންގެ ސައްލާ" ފެށުމުގެ ރަސްމިއްޔާތުގައި ވާހަކަފުޅު ދައްކަވަނީ.. ފޮޓޯ: މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް
މި ފޯރަމުގެ ބައިވެރިން މެދުގައި މަޝްވަރާކުރަނީ މައިގަނޑު 7 ކަމަކާ ގުޅޭގޮތުންނެވެ. އޭގެތެރޭގައި ހިމެނެނީ ޕަބްލިކް ޕަރޓިސިޕޭޝަން، ރައްޔިތުންގެ ބައިވެރިވުން އިތުރުކުރެވިދާނެ ގޮތްތައް، ކައުންސިލްތަކުން ހިންގާ ޙަރަކާތްތަކުގައި މުޖުތަމަޢުގައި އެކަހެރިކުރެވިފައިވާ ފަރާތްތައް ބައިވެރިކުރުވުން، އިފެކްޓިވް ކޮމިއުނިކޭޝަން، ރައިޓް ޓު އިންފޮމޭޝަން، އޯޕަން ގަވަރމަންޓް، ލާމަރުކަޒީ ނިޒާމުގައި މަދަނީ ޖަމިއްޔާތަކުގެ ބައިވެރިވުން އަދި ރައްޔިތުން ބައިވެރިކުރުމަށް ކައުންސިލްތަކަށް މަސައްކަތްކުރެވިދާނެ ގޮތްތަކެވެ.
މިފަހަރުގެ ފޯރަމްގައި 55 ބައިވެރިން ބައިވެރިވެއެވެ. މީގެ ތެރޭގައި، ކައުންސިލްތަކުގެ ބައެއް ރައީސުންނާއި، މެންބަރުންނާއި އަދި ކައުންސިލްތަކުގައި މަސައްކަތްކުރަ އެސްޖީން ހިމެނެއެވެ. ރަށްވެހި ސައްލާ ކުރިއަށްދާނީ މާދަމާގެ ނިޔަލަށެވެ.
Advertisement
This content is created and paid for by advertisers and does not involve Voice Journalists
