ފެބްރުއަރީމަހުގެ 11 ވަނަ ދުވަހު ބުރުޒުމަގު ޝީބިލްޑިން އިމާރާތް ކައިރީ ހުންނަ ހައުސް ޕްލާޒާ އިމާރާތުގައި ހިނގި އަލިފާނުގެ ހާދިސާއަށްފަހު އެ އިމާރާތުގެ ގޯތިތެރޭގައި ހުރި ހިރުނދުގަސް މިލައި މަރުވިއެވެ. އަލިފާނުގެ ހާދިސާ ހިނގިތާ ގާތްގަނޑަކަށް ދެމަހުގެ މުއްދަތަކަށްފަހު މާލެސިޓީ ކައުންސިލުގެ މުއައްޒަފުން މިއަދު ވަނީ މަރުވެފައި ހުރި ހިރުނދުގަހުގެ ގޮފިތައް ކެނޑުމުގެ މަސައްކަތް ކުރިއަށްގެންގޮސްފައެވެ

މާލެސިޓީ ކައުންސިލުގެ މުއައްޒަފުން އެގަހުގެ ގޮފިތައް ކަނޑާފައިވަނީ، އެގަހުގެ ގޮފިތަކުގެ ސަބަބުން އެމަގުން ހިނގާމީހުންނަށް އުނދަނގޫތަކާ ކުރިމަތިވެފައިވަނިކޮށެވެ. ބައެއްފަހަރު މަގުން ހިނގާފައިވާ މީހުންގެ ބޮލަށް ގަހުގެ ގޮފިގަނޑުގެ ބައިތައް ވެއްޓިފައި އެބަހުއްޓެވެ.

މާލެސިޓީ ކައުންސިލުން މިއަދު އެގަސް ކަނޑައި ގަހުގެ ބައިތައް އުކާލުމުގެ މަސައްކަތް ކުރިއަށްގެންގޮސްފައިވަނީ މިއަދު ހެނދުނެވެ. ގަސް ކަނޑާލުމަށްފަހު ގަހުގެ ބައިތައް ވަނީ އުކާލަފައެވެ. އެހެން ނަމަވެސް މަގުމައްޗަށް އެޅުނު ކުދި ކުނިބުނިތައް ހުރިގޮތަށް ހުރީއެވެ. ސިޓީ ކައުންސިލުގައި ކުނިކަހާމީހުން ތިބިނަމަވެސް އެ ކުނިތައް ނަގާފައެއް ނުވެއެވެ.

Advertisement

ހައުސް ޕްލާޒާ އިމާރާތުގައި ގަސް ކަނޑާލުމަށް ބުރުޒުމަގު އެހިސާބު ބަންދުކޮށްފައި.. ފޮޓޯ: ވޮއިސް

މަގުމަތިން ގަސްކެނޑިއިރު ހުރި ކުނިބުނިތައް ނުނެގިއުޅެނިކޮށް މިއަދު ވެހުނު ވިއްސާރައާއެކު ގިނަ އަދަދެއްގެ ކުނިތައް ވަނީ ކާނުގަނޑަށްވަދެފައެވެ. މާލެ ސަރަހައްދަށް މިއަދު ވިއްސާރަވެހޭނޭކަމަށް މޫސުމާ ބެހޭ ޤައުމީ އިދާރާއިން ލަފާކޮށްފައިވަނިކޮށް، ގަސްކަނޑާފައި ކުދި ކުނިބުނިތައް މަގުމައްޗަށް ދޫކޮށްލާފައި ދިއުމަކީ ވަރަށް ޒިއްމާދާރުކަން ކުޑަގޮތަކަށް ކުރިކަމެއްމަށް އެހިސާބުގައި ދިރިއުޅެމުންދާ ބައެއް މީހުންވަނީ ޝަކުވާކޮށްފައެވެ.

"ވެހުނު ވާރެއާއެކު މި ސަރަހައްދު މިއޮތީ ކުނިތަކާއެކު މުޅިން ހަޑިވެފައި. ކުދިކުނިތައް ނަގާލާފައި ދިޔަނަމައީ ކިހާ ރަނގަޅު. މިއޮތީ ހަރާމްޒާދާ ކެޔޮދަނޑު ސާފްކުރާ އުސޫލުން ކަންކޮށްފައި" ޕްލާޒާ ސަރަހައްދުގައި ހުރި އޮފީހެއްގައި މަސައްކަތްކުރާ ޒިންމާދާރު ވެރިއަކު ވޮއިސްއާ ވާހަކަދައްކަމުން ބުންޏެވެ.

ހައުސް ޕްލާޒާ އިމާރާތުގައި ގަސް ކަނޑާފައި ބުރުޒުމަގަށް އެޅިފައިހުރި ކުނިތައް.. ފޮޓޯ: ވޮއިސް

ހަރާމްޒާދާ ކެޔޮދަނޑު ސާފްކުރުމަށް މިސާލުޖަހައި އުޅެނީ ގޮތަކަށް ނުވާގޮތަށް ކުރާ ކަންތައްތަކަށް ނިސްބަތްކޮށެވެ

ބުރުޒުމަހު ޕްލާޒާ އިމާރާތް ހުންނަ ސަރަހައްދަކީ މާލޭގައި އެންމެބޮޑަށް ފެންބޮޑުވާ އެއް ސަރަހައްދެވެ. އެކަން އެހެން އޮއްވައި ގަސްކަނޑައި ކުނިތައް ސާފުނުކޮށް ދިއުމުގެ ސަބަބުން އެ ހުރިހާ ކުނިތަކެއް އެޅޭނީ ކާނުގަނޑުތެރެއަށެވެ. މާލެސިޓީން މިހާރުވެސް ދަނީ މާލެސިޓީގެ މަގުތަކުގައިހުރި ކާނުތައް ނަގައި ސާފްކުރުމުގެ މަސައްކަތްކުރަމުންނެވެ. މިގޮތުން ކާނުތައް ނަގައި ކޮންމެ ދުވަހަކުވެސް ގިނަ އަދަދެއްގެ ކުނިތައް އުކާލައެވެ.

މާލެސިޓީ މަގެއްގެ ކާނުތެރެއިން ނަގާފައިހުި ކުނިތަކެއް... ފޮޓޯ: ވޮއިސް

މާލެސިޓީއަށް ވާރޭ ވެހޭއިރު މަގުތަކުން ފެން ހިންދުމުގައި އެންމެބޮޑު އެއް ހުރަހަކަށް ވެފައި އޮންނަނީ ކާނުތެރެ ކުނިތަކުން ފުރިފައި އޮންނަ މައްސަލައެވެ. ކާނުތަކަށް ކުނިއެޅުމަކީ މަގުތަކުގައި ހެދޭ ފަންގަނޑު ހިންދުމަށް ކުރިމަތިވާ ވަރަށްބޮޑު ގޮންޖެހުމެއްކަމަށް މާލެސިޓީ ކައުންސިލުން ފާހަގަކުރާ ކަމެކެވެ. ކަން މިހެން އޮއްވައި މާލެސިޓީ ފަދަ ޒިންމާދާރު މުއައްސަސާއަކުން މިގޮތަށް ކަންކަންކުރުމަކީ ވަރަށް ދެރަވަރުކަމެއްކަމަށް ބައެއް މީހުން ފާހަގަކުރިއެވެ.