ދިވެހިން އާންމުކޮށް ދަތުރުކުރާ ބޭރު ޤައުމުތަކުގައި ދިވެހި އައިޑީ ކާޑު ހެއްދުމުގެ ޚިދުމަތް ފޯރުކޮށްދިނުމަށް ތައްޔާރުވަމުންދާ ހޯމް މިނިސްޓްރީން ބުނެފިއެވެ.
ބުނެފައިވަނީ، މި އަހަރުގެ ތެރޭގައި ރާއްޖޭގެ ހުރިހާ ރަށެއްގައި އައިޑީ ކާޑު ޕްރިންޓްކުރުމުގެ ޚިދުމަތް ފެށުމުގެ މަސައްކަތް ކުރިއަށްދާއިރު، ދިވެހިން ގިނައިން ދަތުރުކުރާ ބައެއް ބޭރު ޤައުމުތަކުގައިވެސް މި ޚިދުމަތް ފޯރުކޮށްދިނުމަށް ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) އިން ތައްޔާރުވަމުންދާ ކަމަށެވެ. މިނިސްޓްރީން އިތުރަށް ހާމަކުރި ގޮތުގައި، މެލޭޝިއާ، ސްރީ ލަންކާ، އިންޑިއާ އަދި އިނގިރޭސިވިލާތުގައި މި ޚިދުމަތް ތަޢާރަފުކުރުމަށް ޑީއެންއާރުން މަސައްކަތްކުރަމުންދެއެވެ.
މީގެ އިތުރުން، މިނިސްޓްރީން ފާހަގަކޮށްފައިވަނީ މި މަހުގެ ތެރޭގައި އިތުރު ހަތަރު ރަށެއްގައި އައިޑީ ކާޑު ޕްރިންޓްކުރުމުގެ ޚިދުމަތް ފެށޭނެ ކަމަށެވެ. މި ރަށްތަކަކީ ށ. ފުނަދޫ، ށ. މިލަންދޫ، ނ. ވެލިދޫ އަދި މ. މުލި އެވެ. މިހާރުވެސް ޑީއެންއާރުން ވަނީ 15 ރަށެއްގައި އައިޑީ ކާޑު ޕްރިންޓްކުރުމުގެ ޚިދުމަތް ފަށާފައެވެ. މި ރަށްތަކުގައި ޚިދުމަތް ފޯރުކޮށްދެމުންދަނީ އެ ރަށްރަށުގެ ކައުންސިލްތަކާ ގުޅިގެންނެވެ. އައިޑީ ކާޑާއި ޕާސްޕޯޓް ހެއްދުމަށް ކޮންމެ ފަހަރަކު މާލެ އައުމުގެ ބުރަ ނުއުފުލަންޖެހޭ ގޮތަށް ހެދުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިންތިޚާބީ ވަޢުދެކެވެ. މާލެ ސަރަޙައްދުގައިވެސް ހުޅުމާލެ އަދި ވިލިމާލޭގައި މި ޚިދުމަތްތައް ލިބޭނެ އިންތިޒާމު މިހާރު ވަނީ ހަމަޖެހިފައެވެ.
Advertisement
This content is created and paid for by advertisers and does not involve Voice Journalists
