ކުރިއަށްއޮތް ތަނުގައި 4 ފުރޮޅުލީ އުޅަނދު ރާއްޖެއަށް އެތެރެކުރުމުގެ ހުއްދައަށް އެދޭއިރު، ގަރާޖެއް ދައްކަންޖެހޭގޮތަށް ލާޒިމުކޮށް ޤަވާއިދަށް ބަދަލު ގެނެސްފިއެވެ.

ކުރިން އޮންނަގޮތުން ހަތަރު ފުރޮޅުލީ އުޅަނދެއް އެތެރެކުރާއިރު، ގަރާޖު ސިޓީއެއް ހުށަހަޅަން ޖެހެއެވެ. ނަމަވެސް ގަވާއިދަށް ގެނައި ބަދަލާއެކު، 4 ފުރޮޅުލީ އުޅަނދެއް ގެނައުމުގެ ހުއްދައަށް އެދި ހުށަހަޅާއިރު، ގަރާޖެއްގައި އެ އުޅަނދު ބޭއްވުމާމެދު ގަރާޖުގެ ވެރިފަރާތުގެ އިއުތިރާސެއް ނެތްކަމުގެ ލިޔުމާއި، ގަރާޖުގެ ވެރިފަރާތުގެ އައިޑީކާޑުގެ ކޮޕީއަކާއި، އެ އުޅަނދު ބައްވާ ގަރާޖަކީ ރަޖިސްޓްރީކޮށްފައިވާ ގަރާޖެއްކަން އެނގޭނޭ ލިޔުމެއް ހުށަހަޅަންޖެހެއެވެ.

މީގެ އިތުރުން ދެން އުޅަނދެއް ރަޖިސްޓްރީކޮށްދޭނީ، މިނިސްޓްރީން ރަޖިސްޓަރީ ކުރެވޭނެ ކަމަށް ކަނޑައަޅާފައިވާ އުމުރަށްފެތޭ އުޅަނދެއްކަން އަންގައިދޭ ލިޔެކިޔުންވެސް ހުށަހެޅުމުންނެވެ. 

Advertisement

- ބޭނުންކޮށްފައި ހުންނަ އުޅަނދުތަކުގެ ތެރެއިން އިންޖީނު ކެޕޭސިޓީ 250 ސީސީ ނުވަތަ އެއަށްވުރެ ދަަށުގެ މޮޓޯ ސައިކަލާއި އޮޓޯސައިކަލް

- އުފެއްދި ތާރީހުން ފެށިގެން 3 އަހަރުވެފައިވާ މޮޓޯ ސައިކަލާއި އޮޓޯ ސައިކަލް

- އުފެއްދި އަހަރުން ފެށިގެން 5 އަހަރުދުވަހަށްވުރެ އިތުރުވެފައިވާ ކާރު، ވޭން، ބަސް، ލޭންޑްރޯވަރ ފަދަ ދަތުރުފަތުރުކުރުމަށް ގެންގުޅޭ އެއްގަމު އުޅަނދާއި އުފުލޭ ބަރުދަން 1 ޓަނު ހަމަނުވާ އުޅަނދު

- އުފެއްދި ތާރީހުން ފެށިގެން 7 އަހަރަށްވުރެ  އިތުރުވެފައިވާ އުފުލޭ ބަރުދަން އެއްޓަނުން ފެށިގެން 4 ޓަނު ހަމަނުވާ އެއްގަމު އުޅަނދު

- އުފެއްދި ތާރީހުން ފެށިގެން 15 އަހަރުވެފައިވާ ނުވަތަ އެއަށްވުރެ ގިނަ އަހަރުވެފައިވާ ބަރުދަން 10 ޓަނުން ފެށިގެން މަތީ އެއްގަމު އުޅަނދު

ނަމަވެސް ދިވެހި ސަރުކާރުން ޑިޕްލޮމެޓިކް އިމްތިޔާޒު ދީފައިވާ ފަރާތްތަކުން އިމްޕޯޓް ޑިއުޓީ ދެއްކުމުން ލިބިދޭ އިސްތިސްނާއާއެކު، ރާއްޖެއަށް އެތެރެކޮށްފައިވާ އުޅަނދެއް ޑިޕްލޮމެޓަކަށް ނޫން އެހެން ފަރާތަކަށް ރަޖިސްޓްރީކޮށްދެވޭނީ، އެ އުޅަނދަކަށް ދިވެހި ސަރުކާރުން ދައްކަންޖެހޭ އިމްޕޯޓް ޑިއުޓީ ދެއްކުމުންކަމަށް މި ގަވާއިދުގައި ވަނީ ބަޔާންކޮށްފައެވެ.

މި ޤަވާއިދަށް އަމަލުކުރަން ފެށުމަށް ހަމަޖެހިފައިވަނީ، މިއަދުން ފެށިގެން 90 ދުވަސް ހަމަވާ ތާރީހުން ފެށިެގންނެވެ.

ގަރާޖު ދެއްކުމަށްފަހު ހަތަރު ފުރޮޅުލީ އުޅަނދު އެތެރެކުރެވޭގޮތަށް ޤަވާއިދު އިސްލާހުކުރިއިރު، މާލެ އަދި ހުޅުމާލޭގައި އުޅަނދުތައް ގިނަވުމަކީ މާލެ ސަރަހައްދަށް ކުރިމަތިވެފައިވާ އެންމެބޮޑު މައްސަލައެވެ. މާލެ އަދި ހުޅުމާލޭގައި ދުއްވާ އުޅަނދުތައް އިންތިހާއަށް ގިނަވުމުގެ ސަބަބުން މަގުތަކުގެ ދެފަޅީގައި ޕާކްކުރުމަކީ މިހާރު އާއްމުކަމެކެވެ.