ފިލިޕީންސްގެ ފްލައިން ސްކޫލެއްގައި ޕައިލެޓް ތަމްރީނު ހަދަމުންދަނިކޮށް މަތިންދާބޯޓުގެ ބުރަފަތީގައި ޖެހި އަނިޔާވި ދިވެހި ދަރިވަރު، ޢަބްދުލް މާނިޢުގެ ޙާލަތު ބަލަމުން އަންނަ ކަމަށް ޚާރިޖީ ވަޒީރު ޢަބްދުالله ޚަލީލް ވިދާޅުވެއްޖެއެވެ.

ވަޒީރު ރޭ އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި އިއްޔެގެ ވަގުތެއްގައި ޢަބްދުލް މާނިޢުގެ ބައްޕަ އާމިރުއާ ފޯނުން ގުޅައި ވަޒީރު ވަނީ ދައްކަވާފައެވެ.

"ދަރިފުޅުގެ މަންމައާއި ބޭބެ ފިލިޕީންސް އަށް މިހާރު ދެވިއްޖެ ކަމަށާއި މާތްالله ގެ ވާގިފުޅާއެކު ދަރިފުޅު ރަނގަޅުވަމުން އަންނަ ކަމަށް (ކުއްޖާގެ ބައްޕަ) ވިދާޅުވި." މިނިސްޓަރު ހަލީލް ވިދާޅުވިއެވެ.

Advertisement

މީގެއިތުރުން، ފޮރިން މިނިސްޓްރީ، ހަޔާ އެޑިޔުކޭޝަން މިނިސްޓްރީ އަދި ސިވިލް އޭވިއޭޝަނުން ވެސް ގުޅައި ހާލު އޮޅުންފިލުވި ކަމާއި ސަރުކާރުން މިހާ ގާތުން މިކަން ބަލަމުން ގެންދާތީ އުފާކުރައްވާކަމަށް މާނިއުގެ ބައްޕަ ބުނި ކަން މިނިސްޓަރު ފާހަގަ ކުރެއްވިއެވެ.

އަދި އަދި ފިލިޕީންސް ގައި ތިބި ކިޔަވާ އެހެން ދަރިވަރުންގެ ފަރާތުންވެސް ވަރަށް އެހީތެރިކަން ލިބެމުންދާ ކަމަށާ އެކަމަށް ޝުކުރުވެރިވާ ކަމަށް އާމިރު ބުނި ކަމަށް ވަޒީރު ވިދާޅުވިއެވެ. 

ވަޒީރު ޚަލީލް އިތުރަށް ވިދާޅުވި ގޮތުގައި، މި ޙާދިސާގެ ރިޕޯޓް ލިބުނު ވަގުތުން ފެށިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅާ އެއްގޮތަށް ދިވެހި ސަރުކާރުން ގެންދަނީ ދަރިވަރުގެ ޙާލު ވަރަށް ކައިރިން ބަލަމުންނެވެ.

މާނިއުއަށް އަނިޔާވެފައިވަނީ ހޮނިހިރު ދުވަހުގެ ހެނދުނުގެ ވަގުތުގައި މެކްޓަން ސީބޫ އިންޓަނޭޝަން އެެއާޕޯޓްގައެވެ. ޕައިލެޓް ތަމްރީނުގެ ތެރެއިން މަތިންދާ ބޯޓެއްގެ ބުރަފަތީގައި ޖެހި އޭނާގެ މޫނު މައްޗާއި ބަނޑާއި ކޮނޑަށް އަނިޔާވެފައިވާ ކަމަށް މައުލޫމާތު ލިބެ އެވެ.