ބަންގުލަދޭޝްގެ ރައްޔިތުން އިސްރާއީލަށް ދަތުރު ކުރުން އެގައުމުގެ ވަގުތީ ސަރުކާރުން މަނާކޮށްފިއެވެ. 

އެގޮތުން ބަންގްލަދޭޝްގެ ވަގުތީ ސަރުކާރުން އާދީއްތަ ދުވަހު ވަނީ، އެ ޤައުމުގެ ޕާސްޕޯޓުތަކުގައި "އިސްރާއީލް ފިޔަވައި" ކޮންމެ ގައުމަކަށްވެސް ދަތުރުކުރެވޭނެކަން ހާމަކުރާ ޢިބާރާތް އަލުން ޖަހަން ފަށާފައިވާކަން އިއުލާންކޮށްފައެވެ. މިއީ ބަންގްލަދޭޝްގެ ރައްޔިތުން އިސްރާއީލަށް ދަތުރުކުރުން ރަސްމީކޮށް މަނާކުރުމެވެ.

ބަންގްލަދޭޝްގެ ހޯމް މިނިސްޓްރީގެ ޑެޕިއުޓީ ސެކްރެޓަރީ ނިލިމާ އަފްރޯޒް، ސަރުކާރުގެ ނޫސް އޭޖެންސީ ބަންގްލަދޭޝް ސަންގްބަދް ސަންގްސްތާ (ބީއެސްއެސް) އަށް ވިދާޅުވެފައިވާ ގޮތުން އޭޕްރިލް 7 ވަނަ ދުވަހު ޕާސްޕޯޓާއި އިމިގްރޭޝަން ޑިޕާޓްމަންޓަށް ވަނީ އެކަން އަންގައި ސިޓީ ފޮނުވާފައެވެ.

"މި ޕާސްޕޯޓަކީ އިސްރާއީލް ފިޔަވައި ދުނިޔޭގެ ހުރިހާ ޤައުމަކަށް ބޭނުންކުރެވޭނެ ޕާސްޕޯޓެކެވެ" މި ޢޢިބާރާތް ބަންގްލަދޭޝްގެ ރަސްމީ ދަތުރުފަތުރުގެ ލިޔެކިޔުންތަކުން އުނިކޮށްފައިވަނީ 2021 ވަނަ އަހަރުގެ މެއި މަހުގައި، އޭރުގެ ބޮޑުވަޒީރު ޝެއިޚް ހަސީނާގެ ސަރުކާރުގައެވެ.

ޝެއިޚް ހަސީނާގެ ވެރިކަން ވައްޓާލުމަށް ދަރިވަރުން އިސްނަގައިގެން ކުރި އިހުތިޖާޖުތަކަކަށްފަހު، ފާއިތުވި އަހަރުގެ އޯގަސްޓް މަހު އޭނާ އިސްތިޢުފާދީ އިންޑިއާއަށް ވަޑައިގަތުމާ ގުޅިގެން، އެ ސަރުކާރު ވެއްޓުނެވެ.

ޝެއިޚް ހަސީނާގެ ވެރިކަން ވެއްޓުނުތާ ތިން ދުވަހުގެ ތެރޭގައި، އޯގަސްޓް 8 ވަނަ ދުވަހު މުޙައްމަދު ޔޫނުސްގެ އިސްނެންގެވުމުގެ ދަށުން ވަގުތީ ސަރުކާރެއް އެ ގައުމުގައި ހިންގަން ފެށިއެވެ.