މިނިވަންކަމާއި ސިޔާދަތާއި އިސްތިޤުލާލު އެންމެ ފުރިހަމަ މާނައިގައި ޙިމާޔަތްކުރެއްވުމަށް ރައީސުލްޖުމްހުރިއްޔާ ޑރ. މުހައްމަދު މުޢިއްޒު ޚާއްސަ އަހައްމިއްޔަތު ކަމެއް ދެއްވާ ކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ވަޒީރު މިހެން ވިދާޅުވީ އެމްއެންޑީއެފްގެ 71 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔަތުގައި ވާހަކަފުޅު ދައްކަވަމުން ވަޒީރު ވިދާޅުވީ، ރައީސުލްޖުމްހޫރިއްޔާގެ ރިޔާސީ ބަޔާނުގައި އިޢުލާންކުރެއްވި ފަދައިން އެމްއެންޑީއެފްގެ ކަނޑާއި އެއްގަމުގެ ބާރަށް މި އަހަރު ގިނަ ކުރިއެރުންތަކެއް ލިބޭނެކަމަށެވެ.

އަލަށް ސިފައިންގެ ޚިދުމަތާ ގުޅުނު ދަރިވަރުން، ޤައުމީ ޚިދުމަތުގައި މުރާލިކަމާއެކު ރެޔާއި ދުވާލު މަސައްކަތްކުރުމަށް ނަސޭހަތްތެރިވެވަޑައިގަންނަވަމުން ވަޒީރު ވަނީ ޤާނޫނުއާސާސީއާއި ދިވެހިރާއްޖޭގެ ޤާނޫނުތަކަށް ޙުރުމަތްތެރިކޮށްހިތުމަށާއި ސިފައިންގެ އުޞޫލުތައް ހިތްތަކުގައި ބޭއްވުމަށާއި ނަފްސަށްވުރެ ޤައުމު އިސްކުރުމަށް އެ ދަރިވަރުންގެ ކިބައިން އެދި ވަޑައިގެންފައެވެ.

މިހާރުވެސް ސަރުކާރުން ދިފާޢީ ބާރު ވަރުގަދަކުރުމަށް އެތައް މަސައްކަތްތަކެއްކުރައްވާކަން ފާހަގަކުރައްވަމުން ވަޒީރު ވިދާޅުވީ، ސަރުކާރުން ގެންދަވަނީ ދިފާޢީ ބާރުގެ ޢުމްރާނީ ވަސީލަތްތައްވެސް ތަރައްޤީކުރައްވަމުން ކަމަށެވެ.

ސިފައިންގެ 71 ވަނަ އަސާސީ ތަމްރީނު ކޯހުގައި 115 ދަރިވަރުން ވަނީ ދަސްވެނިވެފައިވާއިރު އެގެ ތެރެއިން 105 ދަރިވަރުންނަކީ ފިރިހެން ދަރިވަރުންނެވެ. އަދި އަނެއް 10 ދަރިވަރުންނަކީ އަންހެން ދަރިވަރުންނެވެ. މި ކޯހުގެ ތަމްރީނުތައް ކުރިއަށްގެން ގޮސްފައިވަނީ ޅ.މާފިލާފުށީގައި ހުންނަ އެމްއެންޑީއެފް ދަ ބޭސިކް ސްކޫލުގައެވެ.