ފެނަކައިން އައިސްޕްލާންޓް ގަތުމުގައި ހިމެނޭ ކޮރަޕްޝަންގެ މައްސަލަ ތަހުގީގުކޮށް ދައުވާކޮށް ދޭން އެދި އޭސީސީން ޕީޖީ އޮފީހަށް މައްސަލަ ފޮނުވައިފި އެވެ.

މިއީ ލ. މާމެންދޫގައި ކައިޒާން އިންވެސްޓްމަންޓުން ގާއިމުކޮށްފައިވާ އައިސްޕްލާންޓް ފެނަކައަށް ގަތުމުގައި ކުންފުނީގެ އުސޫލާއި ހިލާފަށް އަމަލު ކޮށްފައިވާތީ ތަހުގީގު ކުރި މައްސަލައެކެވެ.

މި މައްސަލާގައި ދައުވާކޮށްދޭން އެދުނީ ފެނަކައިގެ އޭރުގެ އެމްޑީ އަހްމަދު ސައީދުގެ މައްޗަށާއި ޗީފް އެކައުންޓެންޓް މުހައްމަދު މަސްއޫދުގެ މައްޗަށެވެ. މި ދެ މީހުންގެ މައްޗަށް ރަސްމީ ހައިސިއްޔަތު ނަހަމަގޮތުގައި ބޭނުން ކުރުމުގެ ދައުވާ އާއި ދައުލަތަށް ފައިދާއެއް ލިބެން އޮތް ކަމެއްގައި ފައިދާ ނުލިބޭ ގޮތަށް އަމަލު ކުރުމުގެ ދައުވާ އެވެ.

Advertisement

އޭސީސީން ބުނީ އައިސްޕްލާންޓްގެ އަގުގެ ގޮތުގައި ހުށައަޅާފައި ވަނީ މާކެޓް ވެލިއުއަށް ވުރެ މާމަތީ އަގެއް ކަމަށެވެ. އަދި އައިސްޕްލާންޓް ފަދަ ތަކެތީގެ ވެލުއޭޝަން ހެދުމުގެ ގާބިލްކަން ފެނަކައިގައި ހުރި ނަމަވެސް، މާކެޓް ވެލިއު ހޯދުމުގެ މަސައްކަތް ނުކޮށް، އައިސްޕްލާންޓް ވިއްކި ފަރާތުން ހުށަހެޅި އަގުތައް ބޭނުންކޮށްގެން ވެލުއޭޝަން ތައްޔާރުކޮށްފައިވާކަން އޮޅުވާލާފައިވާ ކަމަށެވެ.

އަދި ކައިޒާން އިންވެސްޓްމަންޓްގެ އައިސްޕްލާންޓް ފެނަކައިން ގަތުމުން، ފިޝަރީޒް މިނިސްޓްރީއާއެކު ވެފައިވާ އެއްބަސްވުމުގެ ދަށުން އަޅާ އައިސްޕްލާންޓާ ގުޅޭ ސަރުކާރުގެ ސިޔާސަތު ބަދަލުވެގެންދާނެ ކަމަށް ވިދާޅުވެ ސައީދު ދޮގު މައުލޫމާތު ދީފައިވާ ކަމަށް ވެސް އޭސީސީން ކުރި ތަހުގީގުން އެނގިފައިވާ ކަމަށް ވަނީ ބުނެފަ އެވެ.