ބޭރު ޤައުމުތަކުގެ ޑްރައިވިންގ ލައިސަންސް އޮންނަ ބިދޭސީންނަށް ދިވެހިރާއްޖޭގައި ވެހިކަލް ދުއްވުމުގެ ހުއްދަ ދިނުމުގައި އައު އުސޫލެއް ތަޢާރަފުކޮށް، ޑްރައިވިން އިމްތިޙާނެއް ހެދުން ލާޒިމުކުރުމަށް ނިންމައިފިއެވެ.
ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި، މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން ވިދާޅުވި ގޮތުގައި، މީގެ ކުރިން ބިދޭސީންގެ ބޭރު ޤައުމުތަކުގެ ލައިސަންސްތަކަށް ހުއްދަ ދެމުން ގެންދިޔައީ ލުއި އުސޫލަކުގެ ތެރެއިން ކަމަށެވެ. އޭގެ ސަބަބުން، ބައެއް ޙާލަތްތަކުގައި ބިދޭސީންގެ އަމިއްލަ ޤައުމުގެ ލައިސަންސްގެ މުއްދަތަށްވުރެ ދިގު މުއްދަތަކަށް ދިވެހިރާއްޖޭގައި ދުއްވުމުގެ ހުއްދަ ދެވެމުންދިޔަކަން ވަޒީރު ފާހަގަކުރެއްވިއެވެ.
އައު އުސޫލުގެ ދަށުން، ބިދޭސީންނަށް ދިވެހިރާއްޖޭގައި ދުއްވުމުގެ ހުއްދަ ދޫކުރެވޭނީ އެ ފަރާތްތަކުގެ އަމިއްލަ ޤައުމުގެ ލައިސަންސްގެ މުއްދަތާ އެއްވަރަށެވެ. އަދި މި ހުއްދަ ދޫކުރެވޭނީ ދިވެހި ރައްޔިތުންނެކޭ އެއްފަދައިން ޑްރައިވިންގ އެސެސްމަންޓެއް ފުރިހަމަކުރުމަށްފަހުގައި ކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، މާލޭގެ މަގުތަކަކީ ހަނި ގޯޅިތަކެއް ކަމަށްވެފައި، ބޭރު ޤައުމުތަކުގައި ދުއްވުމާ އަޅާބަލާއިރު މާލޭގައި ދުއްވުމަށް ތަފާތު ހުނަރުތަކެއް ބޭނުންވެދާނެތީ، ދިވެހިންނެކޭ އެއްފަދައިން ބިދޭސީންވެސް ޑްރައިވިންގ އެސެސްމަންޓް ފުރިހަމަކުރުމަށްފަހު ނޫނީ ލައިސަންސް ދޫނުކުރުމަށް ޤަވައިދދަށް ބަދަލު ގެނެސްފައިވާ ކަމަށެވެ.
ނިމިދިޔަ ސަރުކާރުން ވަނީ ޓްރާންސްޕޯޓް މިނިސްޓްރީން ޤަބޫލުކުރާ ޤައުމުތަކުން ދޫކޮށްފައިވާ ޞައްޙަ ލައިސަންސް އޮތް ފަރާތްތަކަށް އިމްތިޙާނަކާ ނުލައި ދާއިމީ ލައިސަންސް ދޫކޮށްފައެވެ. މި ލިސްޓުގައި 20 އަށްވުރެ ގިނަ ޤައުމު ހިމެނޭއިރު، އޭގެ ތެރޭގައި އަވައްޓެރި ބައެއް ޤައުމުތައްވެސް ހިމެނެއެވެ.
Advertisement
This content is created and paid for by advertisers and does not involve Voice Journalists
