މާލެ ސިޓީ ކައުންސިލުން މަސައްކަތްތެރިކަމާއި ފަންނީ ތަމްރީނުގެ 50 ސްކޮލަރޝިޕަށް ކުރިމަތިލުމުގެ ފުރުޞަތު ހުޅުވާލައިފިއެވެ.

މި ފުރުސަތުތައް ތައާރަފުކޮށްފައިވަނީ ސްޓްރޯންގް ސިޓީޒް ނެޓްވޯކްގެ އޭޝިއާ ޕެސިފިކް ރީޖަންއާ ގުޅިގެންނެވެ. އެ ކައުންސިލުން ގެޒެޓުކުރި އިޢުލާނެއްގައި ބަޔާންކޮށްފައިވާ ގޮތުގައި، މި ސްކޮލާޝިޕްތައް ހުޅުވާލެވިފައިވަނީ ހަ މައިގަނޑު ދާއިރާއަކަށެވެ.

އެއީ:

* ސިއްހީ އަދި އިޖްތިމާއީ ރައްކާތެރިކަން

* އިމާރާތްކުރުމާއި އިންޖިނިއަރިންގ

* ތައުލީމީ ދާއިރާގެ ފަންނުވެރިން

* އައިޓީ އަދި ޑިޖިޓަލް ދާއިރާ

* ވިޔަފާރި، މެހުމާންދާރީ އަދި ކަސްޓަމާ ހިދުމަތް

* ދަނޑުވެރިކަން

މި ސްކޮލާޝިޕްތައް ދެނީ ޕާކިސްތާނުގައި ކިޔެވުމަށެވެ. ސްކޮލާޝިޕް ލިބޭ ފަރާތްތަކަށް މާލެއިން ޕާކިސްތާނަށް ދަތުރުކުރުމުގެ ޚަރަދާއި، ހުރުމާއި ކެއުމުގެ އިންތިޒާމު އަދި ކޯސް ފީ ހިލޭ ލިބޭނެ އެވެ.

ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި:

* މާލެ ސިޓީގައި ރަށްވެހިވެފައިވުން

* 2025 އެޕްރީލް 1 ގެ ނިޔަލަށް އުމުރުން 18 އާއި 35 އަހަރާ ދެމެދުގެ ޒުވާނަކަށްވުން

* ގްރޭޑް 10 ނިންމާފައިވުން

* އިނގިރޭސި ބަހުން މުޢާމަލާތުކުރުމުގެ އަސާސީ ހުނަރުތައް ލިބިފައިވުން (ކިޔަވައިދިނުން އޮންނާނީ އިނގިރޭސި ބަހުން) 

މި ސްކޮލަރޝިޕް ފުރުޞަތުތަކަށް ކުރިމަތިލުމުގެ މުއްދަތު ހަމަވާނީ އޭޕްރީލް 20 ވާ އާދީއްތަ ދުވަހުގެ މެންދުރުފަހު 2:00 ގައެވެ.

ޝަރުޠު ހަމަވާ މީހުންގެ ތެރެއިން ޝޯޓްލިސްޓް ކުރެވޭ މީހުންނާއި އިންޓަވިއުކޮށް ހޮވޭ 50 މީހުންގެ ނަން ސްކޮލާޝިޕް ހަމަޖައްސާ ފަރާތަށް ފޮނުވުމަށް ވަނީ ހަމަޖެހިފައެވެ.

މި ފުރުސަތަކީ މާލޭގެ ޒުވާނުންނަށް ފަންނީ ތަމްރީނު ހޯދުމަށާއި، އައު ހުނަރުތައް ދަސްކުރުމަށް ލިބޭ މުހިންމު ފުރުސަތެއް ކަމަށާ ޝަރުތު ހަމަވާ މީހުން މި ފުރުސަތުގެ ބޭނުން ހިފުމަށް މާލެ ސިޓީ ކައުންސިލުން ވަނީ އެދިފަ އެވެ.