މ.މުލަކު މަގުހެދުމުގެ މަސައްކަތް ވަރަށް ބާރަށް ކުރިއަށްދާކަމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީން) އިން ބުނެފިއެވެ.

އެކްސްގައި ކުރި ޕޯސްޓެއްގައި އާރުޑީސީން ވަނީ މުލަކު މަގުތައް ހެދުމުގެ މަސައްކަތުގެ އެންމެފަހުގެ މައުލޫމާތު ހިއްސާކޮށްފައެވެ. އާރުޑިސީން ބުނީ މުލަކު މަގު ހެދުމުގެ މަޝްރޫއުގެ ދަށުން ނޫރާނީ ހިނގުން އަދި އަމީނީމަގުގައި ދުވާރުގެ މަސައްކަތް ދަނީ ކުރަމުންދާކަމަށެވެ. އަދި މީގެ އިތުރުން އަލިކިލޭގެފާނު މަގުގައި މަގު ކޮނުމާއި ބެކް ފިލިންގގެ މަސައްކަތް ވެސް ކުރަމުންދާ ކަމަށެވެ.

މުލަކު މަގުތައް ހެދުމުގެ މަސައްކަތް 2021 ވަނަ އަހަރުގެ ހިސާބުގައި ފެށިނަމަވެސް އެކި ސަބަބުތަކާހެދި މިހާތަނަށް އެ މަސައްކަތް ނިމިފައެއް ނުވެއެވެ. މުލަކަކީ ވާރޭ ވެހިއްޖެނަމަ ވަރަށް ފަސޭހައިން މަގުގައި ފެންގަނޑު ބޮޑުވާ ރަށެކެވެ. މުލަކަކީ އެއަތޮޅުގައި އެންމެ އާބާދީބޮޑު ރަށުގެ ތެރެއިން ހިމެނޭ ރަށެކެވެ. އަދި އެރަށުގައި ދުއްވާއެއްޗެހިވެސް ގިނަކަން ފާހަގަކޮށްލެވެއެވެ.

މުލަކުގެ މަގުތައް ހެދުމުގެ މަޝްރޫޢުގެ ދަށުން 15 މަގެއް ހެދިގެންދާއިރު، އެއީ ގާތްގަނޑަކަށް 5.9 ކިލޯ މީޓަރުކަމަށް ކޮންސްޓްރަކްޝަން މިނިސްޓްރީން ވަނީ މީގެކުރިން ބުނެފައެވެ.